18.08.2026 | 23:01
Չեմ հիշում իմ աշխատանքային պարտականություններում օրենքով ինչ էր նախատեսված. Չախոյան. ՏԵՍԱՆՅՈՒԹ
ԱՄՆ Կոնգրեսն ընդունել է 901 միլիարդ դոլարի ռեկորդային պաշտպանական բյուջեն
Քաղաքականություն
18.12.2025 | 15:55
ԱՄՆ 2026 թվականի պաշտպանական բյուջեի օրինագիծը, որը նախատեսում է ռեկորդային՝ 901 միլիարդ դոլարի ռազմական ծախսեր, ընդունվել է Կոնգրեսի կողմից: Սենատում քվեարկության ժամանակ 77 օրենսդիր քվեարկել է Ազգային պաշտպանության լիազորման մասին օրենքի (NDAA) օգտին, 20-ը՝ դեմ, գրում է DW-ի ռուսական ծառայությունը։
Ներկայացուցիչների պալատն անցյալ շաբաթ հաստատել էր այս փաստաթուղթը։ Որպեսզի օրինագիծն ուժի մեջ մտնի, այն այժմ պետք է ստորագրի ԱՄՆ նախագահը։ Սպիտակ տունը հայտարարել է, որ Դոնալդ Թրամփը մտադիր է դա անել։ 2025 թվականի ֆինանսական տարում, որն ավարտվեց սեպտեմբերի 30-ին, ԱՄՆ ռազմական բյուջեն կազմել է 884 միլիարդ դոլար։
Փաստաթուղթը, ի թիվս այլ բաների, նախատեսում է զինծառայողների աշխատավարձի 3,8%-ով բարձրացում, ռազմական տեխնիկայի գնում և ԱՄՆ-ի մրցունակության ամրապնդման միջոցառումներ՝ իր հիմնական մրցակիցների՝ Չինաստանի և Ռուսաստանի նկատմամբ։ NDAA-ն ներառում է մի քանի դրույթներ, որոնք ուղղված են Եվրոպայում անվտանգության ամրապնդմանը, ինչը հակասում է այս ամսվա սկզբին Թրամփի կողմից ներկայացված ԱՄՆ Ազգային անվտանգության ռազմավարությանը:
Ընդհանուր առմամբ, ԱՄՆ 901 միլիարդ դոլարի պաշտպանական բյուջեն գերազանցում է նախագահի կողմից այս կարիքների համար ներկայացված խնդրանքը։ Սպիտակ տունը խնդրել էր Կոնգրեսին 2026 թվականի համար ռազմական ծախսերի համար հատկացնել 892,6 միլիարդ դոլար: Սենատը սկզբում առաջարկել էր այս գումարը հասցնել 925 միլիարդ դոլարի, մինչդեռ Ներկայացուցիչների պալատը լոբբինգ էր անում Թրամփի առաջարկած նույն գումարի համար:
Փաստաթղթում հատուկ շեշտադրում է կատարվում Ուկրաինայի աջակցության վրա: Օրենքն Ուկրաինայի անվտանգության աջակցության նախաձեռնության (USAI) միջոցով հատկացնում է 800 միլիոն դոլար․ 400-ական միլիոն դոլար՝ հաջորդ երկու տարիների ընթացքում: Այս միջոցները կօգտագործվեն Ուկրաինայի զինված ուժերի համար ամերիկյան ընկերությունների միջոցով զենք գնելու համար:
Եվս 175 միլիոն դոլար է հատկացվում Բալթյան երկրների՝ Էստոնիայի, Լատվիայի և Լիտվայի պաշտպանությանը: Բացի այդ՝ օրենքը սահմանափակում է ԱՄՆ Պաշտպանության նախարարության կարողությունը՝ Եվրոպայում ամերիկյան զորքերի թիվը 76,000-ից ցածր նվազեցնելու համար: Եվրոպայում ԱՄՆ հրամանատարին արգելվում է հրաժարվել ՆԱՏՕ-ի Գերագույն դաշնակից ուժերի հրամանատարի պաշտոնից։
Օրինագծի մեջ չի հիշատակվում Թրամփի առաջարկը ԱՄՆ Պաշտպանության նախարարությունը «Պատերազմի նախարարություն» վերանվանելու մասին: Չնայած ԱՄՆ վարչակազմն արդեն օգտագործում է այս անվանումը, իսկ պաշտպանության նախարար Փիթ Հեգսեթն իրեն անվանում է «պատերազմի քարտուղար», փոփոխությունը պետք է պաշտոնապես հաստատվի Կոնգրեսի կողմից:
Թարգմանությունը՝ Էմմա Չոբանյանի
