27.04.2026 | 23:25
ՔԿ նախագահ Արթուր Պողոսյանի մասին գրառման համար ֆեյսբուքյան օգտատիրոջը մեղադրանք է առաջադրվել
Ռուսաստանը և ԱՄՆ-ն այս հանգստյան օրերին բանակցություններ կանցկացնեն Մայամիում. Politico
Քաղաքականություն
18.12.2025 | 13:18
Ռուսաստանի և ԱՄՆ-ի պատվիրակություններն առաջիկա հանգստյան օրերին՝ դեկտեմբերի 20-21-ին, Մայամիում բանակցություններ կանցկացնեն Ուկրաինական պատերազմի դադարեցման շուրջ։ Այս մասին գրում է Politico-ն՝ հղում անելով երկու անանուն աղբյուրների, փոխանցում է BBC-ի ռուսական ծառայությունը։
Ըստ աղբյուրների՝ սպասվում է, որ ամերիկյան կողմից հանդիպմանը կմասնակցեն նախագահի հատուկ բանագնաց Սթիվ Ուիթկոֆը և Դոնալդ Թրամփի փեսան՝ Ջարեդ Քուշները։ Աղբյուրներից մեկի փոխանցմամբ՝ ռուսական կողմից սպասվում է Ռուսաստանի ուղղակի ներդրումների հիմնադրամի ղեկավար Կիրիլ Դմիտրիևի մասնակցությունը։ Վերջին շաբաթներին երեքն էլ մասնակցել են բանակցություններին։ Այս տեղեկատվության պաշտոնական հաստատում դեռևս որևէ մի կողմից չի եղել։
Politico-ն հաղորդում է, որ Սպիտակ տունը չի արձագանքել մեկնաբանության խնդրանքներին։
Դեկտեմբերի 14-ին և 15-ին Ուիթկոֆն ու Քուշները Բեռլինում բանակցություններ են անցկացրել Ուկրաինայի ու եվրոպական երկրների ներկայացուցիչների հետ։ Միացյալ Նահանգները խոստացել է անվտանգության երաշխիքներ տրամադրել Ուկրաինային, եթե պատերազմն ավարտվի, սակայն Կիևի կողմից հնարավոր տարածքային զիջումների հարցը մնում է չլուծված։
Թարգմանությունը՝ Էմմա Չոբանյանի
