12.01.2026 | 01:05
«Բարսելոնան» հաղթեց «Ռեալին» ու դարձավ Իսպանիայի սուպերգավաթակիր․ ՏԵՍԱՆՅՈՒԹ
ԱՄՆ-ն նոր պատժամիջոցներ է պատրաստում, եթե ՌԴ-ն մերժի խաղաղության ծրագիրը. Bloomberg
Քաղաքականություն
17.12.2025 | 17:54
Միացյալ Նահանգները Ռուսաստանի դեմ նոր պատժամիջոցներ է պատրաստում, որոնք կարող են կիրառվել, եթե Վլադիմիր Պուտինը մերժի Ուկրաինայի հետ խաղաղության համաձայնագիրը: Այս մասին չորեքշաբթի օրը հայտնել է Bloomberg-ը՝ հղում անելով իր աղբյուրներին, գրում է Current time-ը:
Ըստ հրապարակման՝ պատժամիջոցները հիմնականում կազդեն էներգետիկ ոլորտի վրա: Մասնավորապես, դրանք կարող են թիրախավորել «ստվերային նավատորմի» նավերը և նավթի առևտրականներին, որոնք նպաստում են ռուսական նավթի վաճառքին: Նշվում է, որ ԱՄՆ ֆինանսների նախարար Սքոթ Բեսենթը քննարկել է այս միջոցառումները մի շարք եվրոպական երկրների դեսպանների հետ, և դրանք կարող են հայտարարվել արդեն այս շաբաթ:
ԱՄՆ նախագահ Դոնալդ Թրամփը նախկինում բազմիցս խոսել է Ռուսաստանի վրա ճնշումը մեծացնելու հնարավորության մասին, եթե այն չհամաձայնվի խաղաղության «գործարքի»։ Հոկտեմբերին Վաշինգտոնը պատժամիջոցներ կիրառեց Ռուսաստանի խոշորագույն նավթային ընկերությունների՝ «Ռոսնեֆտի» և «Լուկոյլի» դեմ։ ԱՄՆ-ն նաև ճնշում է գործադրում Ուկրաինայի վրա։
Խաղաղության համաձայնագրի նախագիծ դեռևս չկա։ Դեկտեմբերի 14-15-ին Բեռլինում կայացած հանդիպման ժամանակ մասնակիցների՝ ԱՄՆ-ի, Ուկրաինայի և եվրոպական երկրների ներկայացուցիչների խոսքով, զգալի առաջընթաց է գրանցվել մի շարք հարցերի շուրջ, սակայն դեռևս կոնսենսուս չկա, օրինակ, տարածքային հարցի շուրջ։
Մոսկվան պնդում է, որ խաղաղության ծրագրի վերջին տարբերակները դեռևս չեն քննարկվել Ռուսաստանի հետ։ Հստակ չէ՝ արդյոք Ռուսաստանի համար կա վերջնաժամկետ՝ համաձայնելու ծրագրին։ Կրեմլի խոսնակ Դմիտրի Պեսկովը նշել է, որ Մոսկվան չի տեսել Bloomberg-ի հրապարակումը, բայց տեղյակ է պատժամիջոցները խստացնելու ծրագրերի մասին։ Պեսկովի խոսքով՝ «ցանկացած պատժամիջոց վնասակար է հարաբերությունների բարելավման համար»։
Դեկտեմբերի 16-ին հայտնի է դարձել, որ ԱՄՆ սենատորների մի խումբ ներկայացրել է ռուսական նավթի գնորդների նկատմամբ պատժամիջոցներ կիրառող օրինագիծ։ Այն կոչ է անում վարչակազմին թիրախային պատժամիջոցներ կիրառել ռուսական նավթի համաշխարհային առևտրին մասնակցող երրորդ կողմերի նկատմամբ։ Նախատեսվում են մի շարք բացառություններ, մասնավորապես, եթե որևէ երկիր զգալի օգնություն է ցուցաբերում Ուկրաինային, այն կարող է ազատվել պատժամիջոցներից։ Դեռևս պարզ չէ, թե երբ կարող է քննարկվել օրինագիծը, առանց Սպիտակ տան աջակցության դրա ընդունման հավանականությունը փոքր է։
Թարգմանությունը՝ Էմմա Չոբանյանի
