30.10.2026 | 17:54
Աշոցքում ՔՊ-ի ավագանու ընտրական ցուցակը կգլխավորի Կարեն Մանուկյանը
Կրեմլը սպասում է, որ Վաշինգտոնը կտեղեկացնի Բեռլինում հանդիպումների արդյունքների վերաբերյալ
Քաղաքականություն
17.12.2025 | 16:52
ԱՄՆ նախագահի հատուկ բանագնաց Սթիվ Ուիթկոֆը այս շաբաթ Մոսկվա չի այցելելու։
«Մենք սպասում ենք, որ պատրաստ լինելուն պես մեր ամերիկացի գործընկերները մեզ կտեղեկացնեն ուկրաինացիների և եվրոպացիների հետ իրենց աշխատանքի արդյունքների մասին», – լրագրողներին ասել է Կրեմլի խոսնակ Դմիտրի Պեսկովը, գրում է BBC-ի ռուսական ծառայությունը։
Կիրակի և երկուշաբթի օրերին Բեռլինում բանակցություններ էին տեղի ունեցել Ուկրաինայի նախագահ Վլադիմիր Զելենսկիի, Ուիթկոֆի և եվրոպացի առաջնորդների մասնակցությամբ։
Երեքշաբթի օրը Նիդերլանդներ կատարած այցի ժամանակ Զելենսկին լրագրողներին ասել էր, որ ամերիկյան կողմը Ռուսաստանին կներկայացնի 20 կետից բաղկացած թարմացված խաղաղության ծրագիր և Մոսկվայի պատասխանը ստանալուց հետո Ուկրաինայի հետ խորհրդակցությունների նոր փուլ կանցկացնի։
Պեսկովը նաև մեկնաբանել է «կամավորների կոալիցիայի», այսինքն՝ Կիևի եվրոպացի դաշնակիցների՝ Ուկրաինա խաղաղության ծրագրի շրջանակներում եվրոպական զորքեր ուղարկելու մտադրությունը։
«Մեր դիրքորոշումը Ուկրաինայի տարածքում օտարերկրյա ռազմական զորքերի ներկայության վերաբերյալ լավ հայտնի է։ Այն ձևակերպվել է նախագահի կողմից և այլ աշխատանքային մակարդակներում։ Այն լավ հայտնի է, բացարձակապես հետևողական և հասկանալի», – ասել է նա (Կրեմլը միշտ դեմ է եղել Ուկրաինայում օտարերկրյա զորքերի տեղակայմանը)։
«Բայց կրկին, սա քննարկման թեմա է», – նշել է Պեսկովը։
New York Times-ը հաղորդել էր ուկրաինական պատերազմը դադարեցնելու ծրագրի որոշ նոր մանրամասներ, որոնք ԱՄՆ-ի, Ուկրաինայի և Եվրոպայի պատվիրակությունները քննարկել են Բեռլինում վերջերս կայացած բանակցությունների ժամանակ։ Խաղաղության նոր պլանը ներառում է ԱՄՆ-ի և Եվրոպայի ուժերի կողմից ռուսական ագրեսիան կանխելու կոնկրետ մեխանիզմներ։
Թարգմանությունը՝ Էմմա Չոբանյանի
