Պոլսի Հայոց պատրիարքը հանդիպել է Թուրքիայի ներքին գործերի նախարարին ու իր մտահոգությունները փոխանցել

Պոլսի Հայոց պատրիարքը  Սահակ Մաշալյանը Անկարայում  հանդիպել է Թուրքիայի ներքին գործերի նախարար Ալի Երլիքայային, գրում է Agos-ը։

Հանդիպմանը ներկա են եղել իշխող «Արդարություն ու զարգացում» կուսակցության՝ Ստամբուլից ընտրված պատգամավոր, դոկտոր Սևան Սըվաջիօղլուն, Մշակույթի և արվեստի քաղաքականության նախագահական խորհրդի անդամ Արամ Կուրանը, Հայր Թեոթիկ Չեթինկայան և Գարո Վռամ Բաբայանը։

Պտրիարք Մաշալյանը փոխանցել է Սուրբ Փրկչի հայկական հիվանդանոցի հիմնադրամի տնօրենների խորհրդի նախագահ Պետրոս Շիրինօղլուի ողջույնները, որը հիվանդության պատճառով չի կարողացել մասնակցել հանդիպմանը։

Արտահայտելով իր մտահոգությունները  հիվանդանոցների հիմնադրամի սպասվող ընտրությունների վերաբերյալ՝ պատրիարք Մաշալյանը նշել է, որ ցանկանում է՝ փոքրամասնությունները ներկայացված լինեն և նրանց կարծիքները հաշվի առնվեն նոր սահմանադրության մշակման գործընթացում։

Ներքին գործերի նախարարը հայտարարել է, որ այս հարցերի շուրջ աշխատանքը կիրականացվի հարցի զգայունությունը հաշվի առնելով։

Պաշտոնական տեղեկագրում հրապարակված կանոնակարգի շնորհիվ փոքրամասնությունների հիմնադրամները կարողացան ընտրություններ անցկացնել 2022 թվականին, և հիմնադրամների մեծ մասում պաշտոնը ստանձնեցին նոր կառավարիչներ։ Սակայն, շեղվելով ավանդույթից, կանոնակարգը հիվանդանոցային հիմնադրամներին բացառել է ընտրություններից՝ նշելով, որ այդ հիմնադրամների համար նոր կանոնակարգ կհրապարակվի 2023 թվականին։

Այդ ժամանակվանից անցել է երկու տարի, և որևէ կանոնակարգ դեռևս չի հրապարակվել։

Agos-ը գրում է, որ Սուրբ Փրկիչ հայկական հիվանդանոցի, Բալըքլիի հունական հիվանդանոցի, Սուրբ Հակոբ հայկական հիվանդանոցի և Բալաթ կամ Ահաիմ հրեական հիվանդանոցի հիմնադրամների ընտրությունները պետք է տեղի ունենային 2023 թվականին։

Անցել է երկու տարի, և դեռևս պարզ չէ, թե ինչու կանոնակարգերը չեն հրապարակվել. Անկարայից որևէ բացատրություն չի տրվել։ Վերջին երկու տարիների ընթացքում կատարված բոլոր շփումներում պաշտոնական պատասխանը եղել է «նախապատրաստական ​​​​աշխատանքներ են ընթանում»։

Թարգմանությունը՝ Էմմա Չոբանյանի