Կիևի «Դինամոյի» գլխավոր մարզիչի պաշտոնակատար Իգոր Կոստյուկը խոսել է Հայաստանի չեմպիոն ու գավաթակիր «Նոայի» դեմ Կոնֆերենցիաների լիգայի 6-րդ տուրի հանդիպման մասին։
«Մեր ակումբն ունի անուն, ուստի մենք իրավունք չունենք խաղադաշտ դուրս գալ անտարբերությամբ՝ նույնիսկ եթե հանդիպումը ոչինչ չի որոշում։ Կա ակումբի պատիվ, որը պարտավոր ենք պաշտպանել։
Չնայած նրան, որ «Նոան» հայկական թիմ է, ըստ էության, այնտեղ միայն լեգեոնականներ են խաղում։ Հայ ֆուտբոլիստները հիմնականում պահեստայինների թվում են։ Մենք պետք է առավելագույն կենտրոնացվածությամբ մոտենանք հանդիպմանը և պահենք ակումբի դեմքը»,- ասել է ուկրաինացի մասնագետը։
Ուկրաինական ակումբը «Նոային» կընդունի չեզոք դաշտում։ Հանդիպումը կկայանա նոյեմբերի 18-ին Լեհաստանի Լյուբլին քաղաքի «Լյուբլին Արենա» ստադիոնում ու կմեկնարկի Երևանի ժամանակով կեսգիշերին։
«Նոան» 5 խաղից հետո ունի 8 միավոր և Լիգայի փուլի վերջին տուրից առաջ գործնականում ապահովել է փլեյ-օֆֆի ուղեգիրը, իսկ «Դինամոն» վաստակել է 3 միավոր ու կորցրել է հաջորդ փուլ դուրս գալու շանսերը։
Կոնֆերենցիաների լիգայի այս մրցաշրջանում «Նոան» հաղթել է խորվաթական «Ռիեկային» (1։0) ու լեհական «Լեգիային» (1։0), ոչ-ոքի գրանցել ռումինական «Ունիվերսիտատեա Կրայովայի» (1։1) ու շոտլանդական «Աբերդինի» (1։1) հետ և պարտվել Չեխիայի գավաթակիր «Սիգմային» (1։2)։
