22.02.2026 | 00:10
Արթուր Ավետիսյանը՝ աշխարհի գավաթի հաղթող, Մամիկոն Խաչատրյանը՝ արծաթե մեդալակիր
1055 անձ հոսպիտալացվել է․ ինչ վիրուսներ են շրջանառվում Հայաստանում. ՏԵՍԱՆՅՈՒԹ
Հասարակություն
16.12.2025 | 14:15
ՀՀ-ում սուր շնչառական վարակների ակտիվություն է դիտվում։ Այս մասին ասաց Առողջապահության նախարարության Հիվանդությունների վերահսկման և կանխարգելման ազգային կենտրոնի վիճակագրության ու վերլուծության բաժնի պետ Աիդա Հովհաննիսյանը։
«50-րդ շաբաթվա ընթացքում գրանցվել է սուր շնչառական վարակներով պայմանավորված 15.151 դիմելիություն, ինչը համեմատած նախորդ շաբաթվա հետ բարձր է 1.2 անգամ։ Գրանցված դեպքերի 80 տոկոսը կազմում են 0-ից 18 տարեկան երեխաները։ Առավել բարձր հիվանդացության ցուցանիշ գրանցվել է Արմավիրի, Շիրակի, Արարատի մարզերում և Երևան քաղաքում»,- նշեց Հովհաննիսյանը։
Մասնագետի խոսքով՝ Հայաստանում այս պահին շրջանառվում են գրիպի Ա տեսակի H3N2 ենթատեսակը, բոկավիրուսի և ռինովիրուսի հարուցիչները։
«Սուր շնչառական վարակների դեպքում ախտանշանները հիմնականում նույնն են՝ ընդհանուր թուլություն, հարբուխային վիճակ, այսինքն՝ քթահոսություն, հազ, փռշտոց, ջերմության բարձրացում։ Իսկ գրիպի դեպքում հիվանդության սկիզբը լինում է ավելի սուր, և հետո կարող են ի հայտ գալ հարբուխային երևույթներ, նաև ջերմությունն է ավելի բարձր լինում, հաճախ՝ ոչ կառավարելի»,- մանրամասնեց մասնագետը։
Հովհաննիսյանի խոսքով՝ գրիպի դեպքում թոքաբորբի ռիսկն ավելի բարձր է։ «50-րդ շաբաթվա ընթացքում առաջնային պահպանման կազմակերպություններ դիմել է 937 պացիենտ, ինչը նախորդ շաբաթվա համեմատ բարձր է 1.3 անգամ։ Թոքաբորբի դեպքում խոցելի խումբը 0-ից 18 տարեկան երեխաներն են»,- նշեց ԱՆ մասնագետը։
Նրա խոսքով՝ 1055 անձ հոսպիտալացվել է, ավելի քան 90 տոկոսը 0-18 տարեկան երեխաներն են։ Մանրամասները՝ տեսանյութում։
