12.11.2024 | 23:27
Գրետա Թունբերգը ժամանել է Հայաստան
Ինդոնեզիայում բացառել են պայթյունի հետևանքով Boeing 737-ի կործանումը
Քաղաքականություն
05.11.2018 | 13:10
Ինդոնեզական Lion Air ավիաընկերության Boeing 737 օդանավը կործանվել է մեծ արագությամբ ջրին բախվելու հետևանքով: Այս մասին հայտնել է Ինդոնեզիայի տրանսպորտի անվտանգության ապահովման հանձնաժողովի ղեկավար Սոերջանտո Տաջահոնոն, գրում է Gazeta.ru-ն՝ վկայակոչելով Detik News-ը:
«Սև արկղի» տվյալների համաձայն, որում ձայնագրվել է օդանավի 69 թռիչքային ժամերի մասին տեղեկությունը, ջրի հետ բախման ժամանակ ինքնաթիռը բարձր արագություն է ունեցել: Փորձագետները դեռևս պետք է գտնեն նաև երկրորդ «սև արկղը», որում օդանավի անձնակազմի խոսակցության ձայնագրությունն է:
Սոերջանտո Տաջահոնոն ընդգծել է, որ օդանավի բեկորները շուրջ 500 մետրի վրա են, իսկ պայթյունի դեպքում կործանման հետևանքներն այլ տեսք կունենային:
Հիշեցնենք, որ Lion Air ավիաընկերության օդանավը կործանվել է հոկտեմբերի 29-ին: Ջակարտայից Պանկալպինանգ ուղևորվող օդանավը ռադարների էկրաններից անհետացել է թռիչքից շուրջ 10 րոպե հետո: Օդանավում 189 մարդ է եղել, այդ թվում՝ անձնակազմի անդամներ. բոլորը զոհվել են:
Boeing 737-ի որոնողական աշխատանքների ժամանակ նաև ջրասուզակ է զոհվել:
