Եվրոպայի առաջնորդները խոստանում են բազմազգ ուժեր ստեղծել Ուկրաինայի համար

Ուկրաինայի եվրոպացի դաշնակիցները առաջարկել են ստեղծել բազմազգ ուժեր՝ Կիևի և Մոսկվայի միջև հնարավոր խաղաղության համաձայնագրի իրականացումն ապահովելու համար։ Այս մասին ասվում է Գերմանիայի, Ֆրանսիայի, Մեծ Բրիտանիայի, Իտալիայի, Լեհաստանի, Ֆինլանդիայի, Նորվեգիայի, Շվեդիայի, Նիդերլանդների, Դանիայի, ինչպես նաև Բեռլինում բանակցություններին մասնակցած Եվրոպական խորհրդի և Եվրոպական հանձնաժողովի ղեկավարների համատեղ հայտարարության մեջ։ Հայտարարությունը հրապարակվել է Գերմանիայի կառավարության կայքում երկուշաբթի՝ դեկտեմբերի 15-ի երեկոյան, գրում է DW-ի ռուսական ծառայությունը։

«Եվրոպայի գլխավորությամբ «Ուկրաինայի բազմազգ ուժերը», որոնք ստեղծվել են «Կամավորների կոալիցիայի» շրջանակներում շահագրգիռ երկրների կողմից և աջակցվել են Միացյալ Նահանգների կողմից, կնպաստեն Ուկրաինայի զինված ուժերի վերականգնմանը, կապահովեն Ուկրաինայի օդային տարածքի անվտանգությունը և կպահպանեն ծովային անվտանգությունը, այդ թվում՝ Ուկրաինայի տարածքում գործողությունների միջոցով»,- նշվում է փաստաթղթում։

Դրանում ընդգծվում է, որ ուկրաինական բանակի առավելագույն թվաքանակը խաղաղ ժամանակներում պետք է կազմի 800,000 զինվոր՝ «հակամարտությունները զսպելու և Ուկրաինայի տարածքը պաշտպանելու համար»։ Ավելին, պետք է ԱՄՆ-ի գլխավորությամբ ստեղծվի հրադադարի մոնիթորինգի մեխանիզմ միջազգային մասնակցությամբ, ինչպես նաև՝ փոխադարձ դեէսկալացիայի միջոցառումների մշակման մեխանիզմ։

Հայտարարության համաձայն՝ Եվրոպան իր վրա իրավական պարտավորություն է ստանձնում միջոցներ ձեռնարկել՝ «Ուկրաինայի վրա ապագա զինված հարձակման դեպքում խաղաղությունն ու անվտանգությունը վերականգնելու համար»։

«Այդ միջոցառումները կարող են ներառել զինված ուժերի կիրառում, հետախուզական և լոգիստիկ օգնություն, ինչպես նաև՝ տնտեսական և դիվանագիտական ​​գործողություններ», – ասվում է փաստաթղթում։