30.10.2026 | 23:30
Հայաստանի մի շարք հասցեներում էլեկտրաէներգիայի անջատումներ կլինեն
ԱՄՆ-ն ցանկանում է` Կիևը զիջի արևելյան Դոնբասը. բանակցությունների երկրորդ փուլն ավարտվել է
Քաղաքականություն
15.12.2025 | 17:26
Գերմանիայում ավարտվել է Ուկրանիայի նախագահ Վլադիմիր Զելենսկիի և ամերիկյան պատվիրակության միջև բանակցությունների երկրորդ փուլը, գրում է BBC-ի ռուսական ծառայությունը։ Այս մասին հայտնում են «РБК-Украина»-ն և «Суспiльне»-ն՝ հղում անելով Ուկրաինայի նախագահի գրասենյակի աղբյուրներին։
Բեռլինում այսօրվա բանակցությունների փուլը տևել է մոտ մեկուկես ժամ։ «Суспiльне»-ի փոխանցմամբ՝ Գերմանիայի նախագահ Ֆրանկ-Վալտեր Շտայնմայերը այնուհետև ընդունել է Վլադիմիր Զելենսկիին նրա պաշտոնական նստավայրում՝ Բելվյու պալատում։
Կիրակի օրը սկսված բանակցություններին մասնակցում են Ուկրաինայի նախագահ Վլադիմիր Զելենսկին, Գերմանիայի կանցլեր Ֆրիդրիխ Մերցը և ԱՄՆ նախագահ Դոնալդ Թրամփի դեսպաններ Սթիվեն Ուիթկոֆը և Ջարեդ Քուշները։
Սակայն բանակցությունների վերաբերյալ տեղեկացված պաշտոնյան երկուշաբթի օրն ավելի վաղ AFP-ին ասել է, որ ամերիկացի բանակցողները դեռևս ցանկանում են, որ Ուկրաինան զիջի արևելյան Դոնբասի վերահսկողությունը որպես Ռուսաստանի հետ խաղաղության բանակցությունների պայման, ինչը Կիևի համար կարմիր գիծ է։
Ռուսաստանի նախագահ Վլադիմիր «Պուտինը տարածք է ուզում», – ասել է պաշտոնյան՝ հավելելով, որ Միացյալ Նահանգները պահանջում է, որ Ուկրաինան «դուրս գա» այդ շրջաններից, և որ Կիևը «չի համաձայնվում» այս պահանջին։
«Մի փոքր զարմանալի է, որ ամերիկացիները այս հարցում ընդունում են ռուսների դիրքորոշումը», – հավելել է պաշտոնյան։
Թարգմանությունը՝ Էմմա Չոբանյանի
