29.07.2026 | 00:56
«Արարատ-Արմենիան» դուրս եկավ Չեմպիոնների լիգայի որակավորման երրորդ փուլ. ՏԵՍԱՆՅՈՒԹ
Արգենտինայի հավաքականը կարող է զրկվել ԱԱ-2026-ի մասնակցության իրավունքից
15.12.2025 | 18:38
Արգենտինայի հավաքականը կարող է զրկվել 2026թ․ աշխարհի առաջնությանը մասնակցելու իրավունքից՝ Արգենտինայի ֆուտբոլի ասոցիացիայում (AFA) կոռուպցիոն սկանդալի ֆոնին, հաղորդում է La Nacion-ը։
Կասկածի տակ են հայտնվել AFA-ի ղեկավար պաշտոնյաները՝ կազմակերպության նախագահ Կլաուդիո Տապիան, նրա վստահված անձ Պաբլո Տովիգինիոն և ֆինանսական վարչության ղեկավարի տեղակալ Լուսիանո Նակիսը։ Դատարանը քննության է առնում Պիլար քաղաքում գտնվող 10 հեկտար տարածքով կալվածքի սեփականության իրավունքը, ինչպես նաև այնտեղ գտնվող ուղղաթիռային հարթակը, ձիաբուծական ֆերման և ավելի քան 50 ռետրո ավտոմեքենաները։
Նշվում է, որ Ֆուտբոլի միջազգային ֆեդերացիան (ՖԻՖԱ) կարող է Արգենտինայի հավաքականին հեռացնել ԱԱ-2026-ի մասնակիցների ցանկից, եթե քննության արդյունքներով սկսվեն դատական գործընթացներ և արձանագրվի պետության միջամտություն ֆուտբոլային ֆեդերացիայի գործունեությանը։
Ավելի վաղ ոստիկանությունը խուզարկություններ էր իրականացրել AFA-ի շենքում և երկրի 13 ֆուտբոլային ակումբներում՝ անօրինական ֆինանսական գործարքներին, մասնավորապես, փողերի լվացմանը մասնակցելու կասկածանքով։ Քննությունը կապված է Sur Finanzas ընկերության հետ, որը հովանավորում էր այդ ակումբներին և պատկանում է Արիել Վալյեխոյին՝ AFA-ի նախագահ Տապիայի մտերիմ ընկերոջը։ Քննչական մարմինները ենթադրում են, որ Sur Finanzas-ը կարող էր ակումբներին տրամադրել վարկեր և ստանալ վճարումներ հեռուստատեսային կամ մարքեթինգային իրավունքների միջոցով։
Հիշեցնենք, որ աշխարհի գործող չեմպիոն Արգենտինայի հավաքականն ընդգրկվել է ԱԱ-2026-ի J խմբում, որտեղ կմրցի Ալժիրի, Ավստրիայի ու Հորդանանի հետ։ 48 մասնակցով առաջին Մունդիալը կայանալու է հունիսի 11-ից հուլիսի 19-ը ԱՄՆ-ում, Մեքսիկայում ու Կանադայում։
