19.05.2026 | 19:47
Գերմանիան Թուրքիայում Patriot համակարգեր կտեղակայի
Ռուսաստանում Pussy Riot խումբը հայտարարվել է «ծայրահեղական կազմակերպություն»
Քաղաքականություն
15.12.2025 | 21:51
Մոսկվայի Տվերսկոյ դատարանը ռուսական Pussy Riot պանկ ռոք խումբը հայտարարել է «ծայրահեղական կազմակերպություն» և արգելել դրա գործունեությունը Ռուսաստանում։ Հայցը ներկայացրել էր Ռուսաստանի գլխավոր դատախազությունը։ Գործը քննվել է փակ դռների հետևում, գրում է Meduza-ն։
2025 թվականի սեպտեմբերին Մոսկվայի Բասմանի դատարանը Pussy Riot-ի հինգ անդամներին հեռակա կարգով դատապարտել էր ութից մինչև 13 տարվա ազատազրկման՝ ռուսական բանակի մասին «կեղծ լուրեր» տարածելու մեղադրանքով (Քրեական օրենսգրքի 207.3 հոդվածի 2-րդ մասի «բ» և «դ» կետեր):
Մարիա Ալյոխինան հեռակա կարգով դատապարտվել էր 13 տարվա, Տասո Պլետները՝ 11 տարվա, իսկ Օլգա Բորիսովան, Դիանա Բուրկոտը և Ալինա Պետրովան՝ 8-ական տարվա ազատազրկման:
Pussy Riot-ի դեմ քրեական հետապնդումը սկսվել է նրանց «Մայրիկ, հեռուստացույց մի՛ դիտիր» հակապատերազմական տեսահոլովակի և 2024 թվականի ապրիլի 18-ին Մյունխենի «Pinakothek der Moderne» արվեստի թանգարանում կայացած ելույթի պատճառով։ Ելույթի ընթացքում Pussy Riot-ի անդամները կարգախոսներ էին վանկարկել՝ քննադատելով Ռուսաստանի կողմից Ուկրաինա լայնածավալ ներխուժումը և Վլադիմիր Պուտինին անվանելով ռազմական հանցագործ։
Թարգմանությունը՝ Էմմա Չոբանյանի
