01.04.2026 | 21:55
Քննարկվել են Հայաստանի և Կատարի միջև բարձր տեխնոլոգիաների ոլորտում փոխգործակցության զարգացման հեռանկարները
Իրանում ձերբակալվել է Նոբելյան խաղաղության մրցանակի դափնեկիր Նարգիզ Մոհամմադին
Քաղաքականություն
15.12.2025 | 22:53
Իրանում փաստաբան և իրավaպաշտպան Խոսրով Ալիքորդիի հիշատակի արարողության ժամանակ ձերբակալվել է խաղաղության Նոբելյան մրցանակի դափնեկիր Նարգիզ Մոհամմադին և ևս 38 մարդ։ Այս մասին հաղորդում է Current time-ը։՝ Radio Farda-ին հղումով։
Բոլոր ձերբակալվածները, այդ թվում՝ իրավապաշտպաններ ու ակտիվիստներ, կալանքի տակ են։ Դատախազությունը պնդում է, որ նրանք «սադրիչ հայտարարություններ են արել», որոնք, ենթադրաբար, հավաքվածներին դրդել են «խախտել հասարակական կարգը»։
Մոհամմադիի հիմնադրամի կայքում նշվում է, որ նրան հաջողվել է զանգահարել իր ընտանիքին դեկտեմբերի 14-ին։ Նա ասել է, որ ձերբակալության ժամանակ քաղաքացիական հագուստով տղամարդիկ մահակով հարվածել են իր գլխին և պարանոցին, և որ հետագայում իրեն երկու անգամ տարել են շտապօգնության բաժանմունք։ Մոհամմադին նաև հայտնել է, որ ձերբակալության ընթացքում և դրանից հետո իրեն մեղադրել են «իսրայելական կառավարության հետ համագործակցելու» մեջ։
Նարգիզ Մոհամմադին խոսում է մահապատժի և Իրանում կանանց իրավունքների ու ազատությունների սահմանափակումների դեմ: 2023 թվականին նա արժանացել է Նոբելյան խաղաղության մրցանակի՝ «Իրանում կանանց ճնշման դեմ պայքարի, բոլորի համար մարդու իրավունքների և ազատության համար պայքարի համար»: 2022 թվականին բանտից նա աջակցել է Իրանում բողոքի ցույցերին, որոնք սկսվել են Մահսա Ամինիի մահից հետո, որը ձերբակալվել էր «սխալ ձևով» հիջաբ կրելու համար։
2024 թվականի հունվարին Իրանի դատարանը Նարգիզ Մոհամմադիին, որն արդեն բանտում էր, դատապարտեց 15 ամսվա ազատազրկման՝ Իրանի դեմ քարոզչության համար։ Նա նախկինում մի քանի անգամ դատվել է։ 2016 թվականին նա դատապարտվել է 16 տարվա ազատազրկման՝ պետության դեմ քարոզչության և ազգային անվտանգությանը սպառնալու մեղադրանքով։ 2022 թվականին նա ևս մեկ պատժաչափ է ստացել՝ ութ տարի «պետության դեմ քարոզչության և Սաուդյան Արաբիայի օգտին լրտեսության համար»։ 2023 թվականի օգոստոսին ավելացել է ևս մեկ տարի՝ հարցազրույցների և ՄԱԿ-ին դիմելու համար։
2024 թվականի վերջին, վիրահատությունից հետո, նա ազատ էր արձակվել երեք շաբաթով։ Դատախազությունը կասեցրել էր պատժի կատարումը՝ հիմնվելով դատաբժշկական փորձագետի եզրակացության վրա, իսկ ավելի ուշ երկարաձգել այն։
Թարգմանությունը՝ Էմմա Չոբանյանի
