18.08.2026 | 23:01
Չեմ հիշում իմ աշխատանքային պարտականություններում օրենքով ինչ էր նախատեսված. Չախոյան. ՏԵՍԱՆՅՈՒԹ
Զելենսկին չի բացառել ՆԱՏՕ-ին անդամակցելուց հրաժարվելու հնարավորությունը, եթե Կիևն անվտանգության երաշխիքներ ստանա
Քաղաքականություն
15.12.2025 | 16:17
Ուկրաինայի նախագահ Վլադիմիր Զելենսկին հայտարարել է, որ իր երկիրը կարող է հրաժարվել ՆԱՏՕ-ին անդամակցությունից, եթե ԱՄՆ-ն և եվրոպական երկրները անվտանգության երաշխիքներ տրամադրեն, հաղորդում է Reuters-ը։
«Հենց սկզբից Ուկրաինան ցանկանում էր միանալ ՆԱՏՕ-ին. դա իրական անվտանգության երաշխիք է: ԱՄՆ-ի և Եվրոպայի որոշ գործընկերներ չէին աջակցում այս ձգտմանը», – դեկտեմբերի 14-ին ասել է Զելենսկին՝ WhatsApp-ի միջոցով պատասխանելով լրագրողների հարցերին, գրում է Meduza-ն։
«Այսօր Ուկրաինայի և ԱՄՆ-ի երկկողմանի անվտանգության երաշխիքները, մեզ համար՝ ԱՄՆ-ի կողմից 5-րդ հոդվածի նման երաշխիքները և մեր եվրոպացի գործընկերների, ինչպես նաև այլ երկրների՝ Կանադայի, Ճապոնիայի կողմից անվտանգության երաշխիքները հնարավորություն են՝ կանխելու ռուսական մեկ այլ ներխուժում», – հավելել է Զելենսկին՝ նշելով.
«Եվ սա արդեն մեր կողմից փոխզիջում է»։ Նա հավելել է, որ անվտանգության երաշխիքները պետք է իրավաբանորեն պարտադիր լինեն։
Զելենսկին Ուկրաինայի՝ ՆԱՏՕ-ի անդամակցությունից հնարավոր դուրս գալու մասին հայտարարությունն արել է ԱՄՆ նախագահի հատուկ ներկայացուցիչ Սթիվ Ուիթկոֆի և Դոնալդ Թրամփի փեսա Ջարեդ Քուշների հետ դեկտեմբերի 14-ին Բեռլինում սկսված բանակցություններից առաջ։ Բանակցությունների առաջին օրվանից հետո Ուիթկոֆը հայտարարել է, որ «նշանակալի առաջընթաց» է գրանցվել։
Ուկրաինայի՝ ՆԱՏՕ-ի անդամակցությունից հրաժարվելը Թրամփի վարչակազմի կողմից առաջ մղվող խաղաղության ծրագրի կետերից մեկն է։ Ռուսաստանը բազմիցս հայտարարել է, որ կտրականապես դեմ է Ուկրաինայի՝ Հյուսիսատլանտյան դաշինքին միանալուն։
Թարգմանությունը՝ Էմմա Չոբանյանի
