Մրգի խանութի սեփականատերը զինաթափել է Սիդնեյի լողափին մարդկանց վրա կրակողներից մեկին

Դեկտեմբերի 14-ին Սիդնեյում՝ Բոնդի լողափի շրջանում, կրակոցներ են հնչել։ Ականատեսների խոսքով՝ սև հագուստով երկու տղամարդ կրակ են բացել՝ լողափի մոտ գտնվող փոքրիկ հետիոտնային կամրջակից, փոխանցում է Meduza-ն։

Կրակոցնորը հնչել են Հանուկայի առաջին օրը՝ հրեական կրոնական տոնի, որը այս տարի նշվում է դեկտեմբերի 14-ից մինչև 22-ը։ Կիրակի երեկոյան Սիդնեյում (երբ սկսվել են կրակոցները) անցկացվում էր առաջին մոմի վառման արարողությունը։

Ականատեսներից մեկը պատմել է, որ լսել է մոտ 50 կրակոց։ Մեկ այլ վկայի տվյալներով՝ կրակոցը տևել է շուրջ 10 րոպե։ Նա նկարագրել է տեղի ունեցածը որպես «դժոխք երկրի վրա»։

Ըստ ամենայնի, հարձակվողները երկուսն են եղել, թեև ոստիկանությունն ավելի ուշ հայտնել է, որ ստուգում է նաև երեք կրակողների վարկածը։ Նրանցից մեկը սպանվել է, մյուսը՝ ձերբակալվել, հայտնել են ոստիկանությունից։ Ճշգրտված տվյալներով՝ ձերբակալվածը գտնվում է ծայրահեղ ծանր վիճակում։ Սոցցանցերում հրապարակվել է տեսանյութ, որտեղ, ենթադրաբար, ականատեսը զինաթափում է հարձակվողներից մեկին։

News.com.au կայքը հրապարակել է անցորդի անունը, որը զինաթափել է կրակողներից մեկին։ Դա 43-ամյա մրգի խանութի սեփականատեր և երկու երեխաների հայր Ահմեդ ալ-Ահմեդն է, որը բնակվում է Սիդնեյում։ Նշվում է, որ նա նախկինում զենքի հետ վարվելու փորձ չի ունեցել և պարզապես անցնում էր լողափի մոտով, երբ սկսվել է կրակոցը։

Ահմեդի հարազատները ավստրալիական Channel 7 հեռուստաալիքին հայտնել են, որ տղամարդը ստացել է երկու հրազենային վիրավորում և ներկայում գտնվում է հիվանդանոցում։

«Նա հիվանդանոցում է, և մենք հստակ չգիտենք՝ ինչ վիճակում է։ Մենք հույս ունենք, որ նրա հետ ամեն ինչ լավ կլինի։ Նա հարյուր տոկոսով հերոս է», – ասել է Ահմեդի հարազատը։

Սոցցանցերում տարածվել է տեսանյութ, որտեղ Ահմեդը կրակողի հետ բախումից հետո նստած է գետնին, մինչ մյուս անցորդները փորձում են կանգնեցնել արյունահոսությունը։ Ենթադրվում է, որ նա վիրավորվել է ոտքից։

Նոր Հարավային Ուելս նահանգի վարչապետ Քրիս Մինսը, որի կենտրոնը Սիդնեյն է, մամուլի ասուլիսի ժամանակ հայտարարել է, որ կրակոցի հետևանքով զոհվել է 12 մարդ։ Նա տեղի ունեցածը Սիդնեյի հրեական համայնքի դեմ հարձակում է որակել։ Նահանգի ոստիկանության հանձնակատար Մել Լեյոնը հայտնել է 29 վիրավորի մասին, որոնց թվում են երկու ոստիկաններ։ Լեյոնը կրակոցը բնութագրել է որպես ահաբեկչական գործողություն։ Նրա խոսքով՝ վիրավորների թվում կա մեկ երեխա։ Նախնական տվյալներով՝ զոհերի շրջանում երեխաներ չկան։

Իսրայելցի լրագրող Նաֆտալի Խանանիան գրում է, որ կրակոցի հետևանքով սպանվել է ռաբբի Էլի Շլանգերը։ Newsru.co.il-ի տվյալներով՝ տուժածների թվում է Իսրայել-Ավստրալիա խորհրդի նախագահ Արսեն Օստրովսկին, որը վիրավորվել է գլխից։