Լուկաշենկոյի կողմից ազատ արձակված քաղբանտարկյալները լքել են Բելառուսի տարածքը

Այսօր ազատ արձակված բոլոր բելառուս քաղբանտարկյալները լքել են երկրի տարածքը։ Այդ մասին «Զերկալո»-ին հայտնել է Տիխանովսկայայի խորհրդական Դենիս Կուչինսկին։

Լուկաշենկոյի մամուլի ծառայության հետ կապ ունեցող տելեգրամյան ալիքներից մեկը հաղորդում է, որ ընդունվել է որոշում՝ ներում շնորհելու «տարբեր երկրների 123 քաղաքացիների»՝ բելառուսական կալիումի նկատմամբ պատժամիջոցների վերացման դիմաց։ Ազատ արձակվածների թվում են՝

Մարիա Կոլեսնիկովա-Բաբարիկոյի շտաբի ղեկավար,

Վիկտոր Բաբարիկո-Բելառուսի նախագահի նախկին թեկնածու,

Ալես Բյալյացկի-Նոբելյան մրցանակի դափնեկիր, իրավապաշտպան,

Մարինա Զոլոտովա-TUT.BY-ի գլխավոր խմբագիր,

Մաքսիմ Զնակ-փաստաբան, Բաբարիկոյի շտաբի իրավաբան,

Վալենտին Ստեֆանովիչ- իրավապաշտպան,

Վլադիմիր Լաբկովիչ-իրավապաշտպան,

Ալեքսանդր Ֆեդուտա- քաղաքագետ,

Նատալյա Բելսկայա-քաղաքագետ,

և այլք։ Նրանք Ուկրաինա են տեղափոխվել։

Նշենք՝ Կոլեսնիկովան բելառուսական ընդդիմության ամենահայտնի գործիչներից մեկն է, քաղաքական ակտիվիստ։ 2020 թվականին Բելառուսում նախագահական ընտրություններից առաջ Մարիա Կոլեսնիկովան դարձավ ընդդիմադիր շարժման առանցքային դեմքերից մեկը։ Նա ընդգրկված էր այսպես կոչված «կանանց եռյակում»՝ Սվետլանա Տիխանովսկայա, Վերոնիկա Ցեպկալո, Մարիա Կոլեսնիկովա։

2020թ. սեպտեմբերին Կոլեսնիկովան ձերբակալվել է։ Նրան մեղադրել են «իշխանությունը զավթելու փորձի», «սահմանադրական կարգի խախտման կոչերի» համար։ 2021-ին դատապարտվել է 11 տարվա ազատազրկման։

Միջազգային իրավապաշտպան կազմակերպությունները նրան քաղաքական բանտարկյալ են ճանաչել։