2026-ի սկզբից ձեր աշխատավարձի մի մասը կուղղվի առողջության համապարփակ ապահովագրությանը։
Որքան է պահվելու աշխատավարձից
Եթե ձեր «կեղտոտ» աշխատավարձը 200 001 հազարից մինչև 500 հազար դրամ է, ապա ձեր առողջության ապահովագրավճարը կազմելու է 10 800 դրամ, որից 6000 դրամը վճարելու է պետությունը։
4500 դրամը Զինապահի դրոշմանիշային գումարն է, որն այս տարվանից նվազել է 1000 դրամով։ Սա նույնպես ամբողջությամբ կուղղվի առողջության ապահովագրությանը։
Մնում է ընդամենը 300 դրամ, որն էլ գանձվելու է ձեր աշխատավարձից և վճարվելու է առողջության ապահովագրությանը։
Երբ ուժի մեջ կմտնի որոշումը և երբվանից կգործի նոր համակարգը
Փաթեթն ընդունելուց հետո այն ուժի մեջ կմտնի դեկտեմբերին, ստորագրման հաջորդ օրվանից, բայց կակտիվանա հունվարի 1-ից։
Ապահովագրավճար վճարողների համար առաջին հաշվարկային ամիս կդիտարկվի նոյեմբերը, քանի որ դեկտեմբերն աշխատավարձերի և պարգևավճարների հավելյալ հաշվարկների առումով շեղող ամիս է: Վճարման ամսաթիվը կլինի մինչև հունվարի 20-ը:
Ում վրա է տարածվում առողջության համապարփակ ապահովագրության փաթեթը
Հունվարի 1-ից գրանցված աշխատող շահառուների այս խմբին կմիանան նաև մինչև 18 տարեկան երեխաները, 65 տարին լրացած քաղաքացիները։ Նրանց համար վճարումը կատարվելու է ինչպես պետական բյուջեից, այնպես էլ համակարգին միանալու համար նախատեսված քաղաքացիների ապահովագրավճարներից:
Առողջապահության նախարարությունը հայտնել էր, որ 2028-ից առողջապահական փաթեթի գինը կբարձրանա՝ ամսական 10 800 դրամի փոխարեն քաղաքացիները 13 700 դրամ կվճարեն։ Նախարարության հաշվարկներով՝ մինչև 2029 թվականը բնակչության 85 տոկոսը պետք է ապահովագրական փաթեթ ունենա:
Դեկտեմբերի 16-ին օրենսդրական փաթեթը կքննարկվի Կառավարության նախաձեռնությամբ գումարվելիք Ազգային ժողովի արտահերթ նիստում:
Անի Թամրազյան
