Առաջարկվում է Վազգեն Սարգսյանի փողոցում տեղադրել Մհեր Մկրտչյանի արձանը

Երևանի ավագանին առաջարկում է Վազգեն Սարգսյան փողոցի 6-րդ շենքի հանդիպակաց մայթին հարող կանաչ տարածքում տեղադրել մեծանուն դերասան Մհեր Մկրտչյանի արձանը։ Factor.am-ը տեղեկանում է, որ նախագիծն ընդգրվելու է ավագանու առաջիկա նիստի օրակարգում։

Արձանի հեղինակները վաստակավոր նկարիչ, քանդակագործ Տիգրան Արզումանյանն ու վաստակավոր ճարտարապետ Աշոտ Ալեքսանյանն են։ Մկրտչյանի արձանը տեղադրելու առաջարկով Երևանի քաղաքապետ Տիգրան Ավինյանին է  դիմել Տիգրան Արզումանյանը։ 

«Կարևորելով Մհեր Մկրտչյանի հիշատակը վառ պահելու, ապագա սերունդներին փոխանցելու, ինչպես նաև անվանի արվեստագետների գործունեությունն ու երախտիքը պատշաճ գնահատելու և ներկայացնելու անհրաժեշտությունը՝ առաջարկվում է տալ համաձայնություն Մհեր Մկրտչյանի արձանի տեղադրմանը»,- նշված է նախագծի հիմնավորման մեջ։ 

ԽՍՀՄ ժողովրդական արտիստ, ՀԽՍՀ պետական մրցանակի դափնեկիր Մհեր Մկրտչյանը ծնվել է 1930 թվականին Գյումրիում։ Սովորել է Գյումրիի նկարչական ու երաժշտական դպրոցներում, միաժամանակ հաճախել է թատերական ինքնագործ խմբակ։ 1945-1946 թվականներին սովորել է Մռավյանի անվան թանտրոնին կից ստուդիայում: Ավարտելուց հետո՝ 1947 թվականին, ընդգրկվել է նույն թատրոնի հիմնական խմբի մեջ։ 1951-1956 թվականներին սովորել է Երևանի պետական գեղարվեստա-թատերական ինստիտուտում:

Մհեր Մկրտչյանը խաղացել է «01-99», «Նվագախմբի տղաները», «Եռանկյունի», «Մենք ենք, մեր սարերը, «Հայրիկ», «Նահապետ», «Կտոր մը երկինք», «Խաթաբալա», «Հին օրերի երգը», «Կովկասի գերուհին», «Միմինո», «Այբոլիտ-66» և այլ ֆիլմերում։

1986 թվականին Մհեր Մկրտչյանի ջանքերով ստեղծվել է Երևանի քաղաքապետարանի Վ. Աճեմյանի անվան արտիստական թատրոնը:

Արփի Հակոբյան