18.08.2026 | 23:01
Չեմ հիշում իմ աշխատանքային պարտականություններում օրենքով ինչ էր նախատեսված. Չախոյան. ՏԵՍԱՆՅՈՒԹ
Սամվել Կարապետյանը 177 օր կալանքի տակ է․ ըստ փաստաբանների՝ նրան անհիմն են պահում
Հասարակություն
12.12.2025 | 17:13
«Սամվել Կարապետյանը քաղաքական պատանդ է, 177 օր նրան անհիմն կալանքի տակ են պահում»,- այսօր տեղի ունեցած մամուլի ասուլիսի ժամանակ ասաց նրա պաշտպան, փաստաբան Արամ Վարդևանյանը։ «Սամվել Կարապետյանի գործով Քրեական դատավարության օրենսգիրքը չի գործում 177 օր շարունակ, հստակ առկա է իրավունքի և օրենքի ոչնչացման վարքագիծ։ Իրավաբաններն ու փաստաբանները մշտապես հենվում են իրավունքի և օրենքի վրա, բայց այստեղ այդ հենարանները չկան։ Ի՞նչն է հստակ առկա՝ քաղաքական հետապնդում, քաղաքական վրեժխնդրություն և ՀՀ-ում քաղաքական պատանդի կարգավիճակ ունեցող Սամվել Կարապետյան»։
Փաստաբանի դիտարկմամբ՝ գործարարի ձերբակալման օրվանից՝ հունիսի 17-ից, ՀՀ-ում «օրենքը դադարել է գործել, իսկ երկրի ամենաբարձր պաշտոնը զբաղեցնող անձը՝ սկսել իրականացրել ֆեյսբուքյան արդարադատություն»։
«Հունիսի 17-ից մինչև այսօր խախտվել է օրենքի գերակայություն հասկացությունը։ Դատախազությունը և քննիչները Կարապետյանի գործով գործում են համատեղ, սակայն նույնիսկ համատեղ աշխատելով, նրանք չեն կարողանում ներկայացնել որևէ ապացույց՝ ձերբակալությունը արդարացնելու համար։ Իսկ դատավորները չեն կարողանում արդարադատություն իրականացնել, քանի որ երկրում տիրում է ճնշման մթնոլորտ»,- հայտարարեց Վարդևանյանը։
Ասուլիսին անդրադարձ կատարվեց նաև ՀԷՑ-ի հետ կապված գործընթացին։ Վարդևանյանի խոսքով՝ Կարապետյանին պահում են անազատության մեջ, որ իշխանությունների համար ավելի հեշտ լինի «խլել ՀԷՑ-ը»։
«Սամվել Կարապետյանի նկատմամբ հետապնդումներն իրականացվում են ՀԷՑ-ը խլելու գործընթացին զուգահեռ։ Սամվել Կարապետյանը քաղաքական պատանդ է։ ՍԴ-ում քննության կարգավորումներով, պետք է բանակցություններ լինեն՝ փոխհատուցման վերաբերյալ, մինչդեռ հնարավո՞ր է մարդու հետ բանակցել, երբ նա ապօրինի կալանավորված է։ Բացի այդ, Սահմանադրական դատարանը ՀԷՑ-ի վերաբերյալ հրատապ կարգով ընդունված օրենքների սահմանադրականությունը որոշել է քննել գրավոր ընթացակարգով, այնինչ մենք միջնորդել էինք բանավոր ընթացակարգ անցկացնելու մասով, սակայն, ՍԴ-ն այն մերժել է»։
Ավելի վաղ Կարապետյանի փաստաբանական խումբն անդրադարձել էր նաև ընտրված խափանման միջոցին։ Մասնավորապես, նոյեմբերի 18-ին Հակակոռուպցիոն դատարանը բավարարել էր քննչական խմբի միջնորդությունը՝ երկու ամսով երկարաձգելով Սամվել Կարապետյանի կալանքը։ Վերաքննիչ դատարանը` նախագահությամբ դատավոր Մելիքսեթյանի, որոշում է կայացրել մերժել փաստաբանական խմբի և դատախազության վերաքննիչ բողոքները.
«Այս ամենն իրավական ցանկացած տիրույթից դուրս է և հաստատապես վերացնում է քրեական դատավարությունը Հայաստանի դատարաններից: Սամվել Կարապետյանի ապօրինի կալանքի երկարաձգման հիմք Առաջին ատյանի դատարանը վկայակոչել էր միայն խոչընդոտելու, իբրև ռիսկը, իսկ Վերաքննիչ դատարանը փաստացի համաձայնել է դրա հետ՝ ուղիղ անտեսելով երեք անհերքելի փաստական տվյալ՝ մեղադրանքի նվազագույն հիմնավորվածության բացակայությունը, շուրջ 6 ամիս ապօրինի կալանքը և այլընտրանքային խափանման միջոցների հնարավորությունը: Չնայած մեղադրանքների աբսուրդայնությանը, մեր կողմից հարկադրված ներկայացված նման միջնորդությունը մերժելու իրավական որևէ հնարավորություն առկա չէր: Այս ամենն ապացուցում է, որ Սամվել Կարապետյանի դեպքում որևէ ձևով՝ դատարաններում իրավունքը չի գործում, իրավական փաստարկները չեն գնահատվում, արդարադատություն չի իրականացվում: Սամվել Կարապետյանի դեպքում բացառապես գործում է՝ քաղաքական հետապնդումը, վրեժխնդրությունը, իրավունքի և օրենքի «վճռական» ոչնչացումը»:
Սամվել Կարապետյանն անազատության մեջ է գրեթե կես տարի։
Հիշեցնենք՝ հունիսի 17-ին Սամվել Կարապետյանին մեղադրանք էր առաջադրվել Քրեական օրենսգրքի 422-րդ հոդվածի 2-րդ մասով, այն է՝ իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչը, որը կատարվել է հրապարակայնորեն ցուցադրվող ստեղծագործությունները կամ զանգվածային լրատվության միջոցները կամ տեղեկատվական կամ հաղորդակցական տեխնոլոգիաներն օգտագործելով: Դատարանը նախաքննական մարմնի միջնորդությունը բավարարել էր և Կարապետյանի նկատմամբ ընտրել խափանման միջոց կալանքը, որն օգոստոսի 15-ին ևս 2 ամսով երկարաձգվել էր։
Ավելի ուշ նրան առաջադրվել էր նաև փողերի լվացման մեղադրանք, իսկ շաբաթներ առաջ մեղադրանքը փոփոխվեց և լրացվեց. Սամվել Կարապետյանը մեղադրվում է Քրեական օրենսգրքի 296-րդ հոդվածի 3-րդ մասի 2-րդ և 3-րդ կետերի՝ իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով առանձնապես խոշոր չափերով փողերի լվացման հատկանիշներով։
Ռոզա Վարդանյան
