07.03.2026 | 16:17
Մարտի 8-ին կայանալիք Մասկատ-Երևան թռիչքի տոմսեր ունեցողները կարող են օգտվել անվճար տեղափոխման հնարավորությունից. դեսպանություն
Ռուսաստանի ԿԲ-ն դատական հայց է ներկայացրել սառեցված ակտիվների վերաբերյալ բելգիական Euroclear դեպոզիտարիայի դեմ
Քաղաքականություն
12.12.2025 | 15:44
Ռուսաստանի Կենտրոնական բանկը հայց է ներկայացրել Մոսկվայի արբիտրաժային դատարան՝ ընդդեմ բելգիական Euroclear դեպոզիտարիայի՝ պահանջելով վնասի փոխհատուցոում։ Այս մասին ասվում է Կենտրոնական բանկի կայքում տեղադրված հայտարարության մեջ, գրում է The Insider -ը։ Հայցը վերաբերում է ռուսական սառեցված ակտիվներին, որոնց մեծ մասը պահվում է Բելգիայի դեպոզիտարիայում։ Պահանջի չափը, սակայն, հայտնի չէ։
«Euroclear-ի դեպոզիտարիայի գործողությունները վնաս են հասցրել Ռուսաստանի բանկին՝ իրեն պատկանող կանխիկ դրամը և արժեթղթերը կառավարելու անկարողության պատճառով», – նշվում է հայտարարության մեջ։
Կենտրոնական բանկը նաև մեկնաբանել է Եվրոպական հանձնաժողովի ծրագրերը՝ Արևմուտքում պահվող իր սառեցված ակտիվները Ուկրաինային օգնելու համար օգտագործելու վերաբերյալ: Նշվում է, որ իր ակտիվների «ուղղակի կամ անուղղակի օգտագործման» մեխանիզմները «անօրինական» են և «հակասում են միջազգային իրավունքին, այդ թվում՝ ակտիվների ինքնիշխան անձեռնմխելիության սկզբունքներին»:
Կենտրոնական բանկը խոստացել է «անվերապահորեն վիճարկել» իր ակտիվների անհամաձայնեցված օգտագործմանը հանգեցնող ցանկացած գործողություն «բոլոր իրավասու մարմիններում», այդ թվում՝ ազգային դատարաններում և օտարերկրյա պետությունների ու միջազգային կազմակերպությունների դատական մարմիններում, «հետագայում՝ դատական որոշումների ՄԱԿ-ի անդամ պետությունների տարածքում կիրառմամբ»։
Ուկրաինայում լայնածավալ պատերազմի սկսվելուց ի վեր, Եվրոպայում ռուսական ակտիվները, որոնց արժեքը կազմում է մոտ 210 միլիարդ եվրո, սառեցվել են։ Այս ակտիվների մեծ մասը պահվում է Euroclear-ում։
Դեկտեմբերի 10-ին հայտարարվել էր, որ Եվրամիությունը մտադիր է արագացնել այն օրենքի ընդունումը, որը թույլ կտա ռուսական ակտիվների վերջնական սառեցում։ Օրենքի նախագիծը ենթադրում է արտակարգ լիազորությունների կիրառում։
Թարգմանությունը`Էմմա Չոբանյանի
