ԱՄՆ-ն պատժամիջոցներ է սահմանել Վենեսուելայի նախագահ Մադուրոյի ընտանիքի նկատմամբ

Թրամփի վարչակազմը նոր պատժամիջոցներ է սահմանել Վենեսուելայի նկատմամբ․ դրանք առնչվում են Նիկոլաս Մադուրոյի կնոջ՝ Սիլիա Ֆլորեսի երեք զարմիկներին, ինչպես նաև նրանց հետ կապված վեց նավթատար տանկերներին և նավագնացության ընկերություններին, մինչ Վաշինգտոնը ճնշում է գործադրում Կարակասի վրա, գրում է Al Jazeera-ն։

Պատժամիջոցների տակ գտնվող զարմիկներից երկուսը նախկինում դատապարտվել են ԱՄՆ-ում թմրանյութերի ապօրինի շրջանառության մեղադրանքով և հետագայում ազատ են արձակվել բանտարկյալների փոխանակման շրջանակներում։

ԱՄՆ-ն նաև թիրախավորում է Վենեսուելայի նավթային ոլորտը՝ պատժամիջոցներ սահմանելով պանամացի գործարար Ռամոն Կարետերո Նապոլիտանոյի նկատմամբ, որն, ըստ ԱՄՆ ֆինանսների նախարարության, նպաստում է նավթամթերքի առաքմանը Վենեսուելայի կառավարության անունից՝ մի քանի նավագնացության ընկերությունների հետ միասին։

ԱՄՆ ֆինանսների նախարարությունը հինգշաբթի օրը հայտարարել է, որ միջոցառումները ներառում են պատժամիջոցներ վեց նավթատար նավերի նկատմամբ, որոնք, ըստ ԱՄՆ ֆինանսների նախարարության, «շարունակում են ֆինանսական ռեսուրսներ տրամադրել, որոնք սնուցում են Մադուրոյի կոռումպացված նարկոահաբեկչական ռեժիմը»։

Չորս տանկեր, այդ թվում՝ 2002 թվականին կառուցված H Constance-ը և 2003 թվականին կառուցված Lattafa-ն, նավարկում են Պանամայի դրոշի ներքո, իսկ մյուս երկուսը՝ Կուկի կղզիների և Հոնկոնգի։

Հինգշաբթի երեկոյան Թրամփը կրկնել է իր սպառնալիքը՝ շուտով հարվածներ հասցնել Վենեսուելայից ԱՄՆ ցամաքային ճանապարհով թմրանյութի փոխադրումներին։ Սպիտակ տան մամուլի քարտուղար Քարոլայն Լիվիթն էլ հայտարարել է, որ ԱՄՆ-ն տանկերը կտանի ԱՄՆ նավահանգիստ։

«Նավը կուղևորվի ԱՄՆ նավահանգիստ, և Միացյալ Նահանգները մտադիր է առգրավել նավթը», – ասել է Լիվիթը մամուլի ասուլիսի ժամանակ։  Մադուրոն դատապարտել է առգրավումը՝ այն անվանելով «ծովահենության ակտ առևտրային, քաղաքացիական և մասնավոր նավի դեմ», հավելելով, որ «տեղափոխում էր 1.9 միլիոն բարել նավթ, որը նրանք գնել էին Վենեսուելայից»։

Վենեսուելայի առաջին տիկին Սիլիա Ֆլորեսի՝ պատժամիջոցների տակ հայտնված զարմիկներ Ֆրանկի Ֆլորեսը և Էֆրեյն Անտոնիո Կամպո Ֆլորեսը հայտնի դարձան 2015 թվականին Հայիթիում ձերբակալվելուց հետո՝ ԱՄՆ թմրանյութերի դեմ պայքարի վարչության կողմից իրականացված գործողության ժամանակ։

Նրա երրորդ զարմիկը՝ Կառլոս Էրիկ Մալպիկա Ֆլորեսը, նույնպես թիրախավորվել էր։ ԱՄՆ իշխանությունները պնդում են, որ նա ներգրավված է եղել պետական ​​նավթային ընկերությունում կոռուպցիոն սխեմայի մեջ։

Հարցին, թե արդյոք Թրամփի վարչակազմը պլանավորում է նավերի հետագա առգրավումներ, Սպիտակ տան խոսնակ Լևիթը լրագրողներին ասել է, որ չի խոսի ապագա գործողությունների մասին, բայց ասել է, որ ԱՄՆ-ն կշարունակի իրականացնել նախագահի պատժամիջոցների քաղաքականությունը։

«Մենք չենք պատրաստվում անտարբեր մնալ և դիտել, թե ինչպես են պատժամիջոցների տակ գտնվող նավերը ծովերով նավարկում սև շուկայի նավթով, որից ստացված եկամուտը կխթանի ամբողջ աշխարհում խարդախ և անօրինական ռեժիմների թմրաահաբեկչությունը», – ասել է նա։

Չորեքշաբթի օրը վենեսուելական նավթի առգրավումը առաջին նմանատիպ միջադեպն էր ԱՄՆ պատժամիջոցների ներքո, որոնք գործում են 2019 թվականից ի վեր: Այս քայլը հանգեցրեց նավթի գների բարձրացման և կտրուկ սրեց լարվածությունը Վաշինգտոնի և Կարակասի միջև:

Թարգմանությունը`Էմմա Չոբանյանի