«Ամերիկան ​​այդ մասին պետք է խոսի Ռուսաստանի հետ». Զելենսկին առաջարկել է կրակի դադարեցում ուկրաինական ընտրությունների ժամանակ

Ուկրաինայի նախագահ Վլադիմիր Զելենսկին առաջարկել է Ուկրաինայում նախագահական ընտրությունների ժամանակ հրադադար հաստատել։ Նա այս հայտարարությունն արել է դեկտեմբերի 11-ին՝ «կամավորների կոալիցիայի» առցանց հանդիպման ժամանակ․ գրում է Meduza-ն։

«Մենք պատրաստ ենք աշխատել նախագահ Թրամփի հետ ցանկացած ձևաչափով։ Եվ եթե նախագահ Թրամփը ավելի շատ է խոսում Ուկրաինայում կայանալիք ընտրությունների մասին, ես ուզում եմ ասել, որ մենք կարող ենք փորձել անցկացնել ընտրություններ։ Ուկրաինան չի թաքնվում ժողովրդավարությունից», – հայտարարել է Զելենսկին։

Նա նշել է, որ ընտրությունները հնարավոր կլինեն, եթե անվտանգությունն ապահովվի, «և Ամերիկան ​​կարող է օգնել այս հարցում ավելի շատ, քան որևէ մեկը»։

«Եթե անհրաժեշտություն կա ընտրություններ անցկացնելու, ապա պետք է կրակը դադարեցնել գոնե ընտրական գործընթացի և քվեարկության ողջ ընթացքում։ Եվ սա այն բանն է, որը պետք է քննարկվի։ Եվ անկեղծ ասած, այստեղ՝ Ուկրաինայում, մենք կարծում ենք, որ Ամերիկան ​​պետք է այդ մասին քննարկի ռուսական կողմի հետ», – հայտարարել է Զելենսկին։

ԱՄՆ նախագահ Դոնալդ Թրամփը դեկտեմբերի 9-ին Politico-ին տված հարցազրույցում հայտարարել էր, որ «եկել է ժամանակը» Ուկրաինայում նախագահական ընտրություններ կազմակերպելու համար։ Զելենսկին նույն օրը հայտարարել էր, որ պատրաստ է ընտրություններն անցկացնել 60-90 օրվա ընթացքում, եթե ԱՄՆ-ն և Եվրոպան ապահովեն անվտանգությունը։

Թարգմանությունը` Էմմա Չոբանյանի