16.02.2026 | 00:04
Հայաստանի գեղասահորդները հաջող մեկնարկեցին Օլիմպիական խաղերում․ ՏԵՍԱՆՅՈՒԹ
Բուլղարիայի վարչապետը հրաժարական է տվել կոռուպցիայի դեմ բողոքի ցույցերից հետո
Քաղաքականություն
11.12.2025 | 17:51
Բուլղարիայի վարչապետ Ռոսեն Ժելիազկովը հայտարարել է, որ իր կառավարությունը հրաժարական է տալիս մեկ տարուց էլ քիչ ժամանակ աշխատելուց հետո՝ կոռուպցիայի դեմ բողոքի ցույցերից հետո, գրում է AFP-ն։
Նրա հայտարարությունը հնչում է խորհրդարանում ընդդիմության կողմից կառավարությանն անվստահություն հայտնելու հարցի վերաբերյալ քվեարկությունից անմիջապես առաջ։ Չորեքշաբթի տասնյակ հազարավոր մարդիկ դուրս էին եկել փողոցներ՝ բողոքելու կառավարության և կոռուպցիայի դեմ։
Ցույցերը սկսվել էին 2026 թվականի բյուջեի նախագծի քննարկումներից, որը ցուցարարները որակել էին որպես լայնածավալ կոռուպցիան քողարկելու փորձ: Կառավարությունն անցյալ շաբաթ հետ է կանչել բյուջեն, սակայն հանրային զայրույթը շարունակվել է։
«Կառավարությունն այսօր հրաժարական է տալիս։ Բոլոր տարիքի, էթնիկ պատկանելության և կրոնների մարդիկ արտահայտվել են հրաժարականի օգտին: Ահա թե ինչու այս քաղաքացիական էներգիան պետք է աջակցվի և խրախուսվի»,- լրագրողներին ասել է Ռոսեն Ժելիազկովը իշխող կուսակցությունների առաջնորդների հանդիպումից հետո։
Եվրամիության ամենաաղքատ երկիրը հունվարի 1-ին պետք է միանա եվրոգոտուն։ Ակնկալվում է, որ դա, ամեն դեպքում տեղի կունենա՝ չնայած կառավարության հրաժարականին։ Վերլուծաբանները նշում են, որ բուլղարական ինստիտուտների և ղեկավարների նկատմամբ ցածր վստահությունը սրվել է գների վերաբերյալ մտահոգություններով, քանի որ երկիրը պատրաստվում է ընդունել եվրոն։
«Բուլղարական հասարակությունը գտնվում է շատ լայն միասնության վիճակում՝ երկրի կառավարման մոդելի դեմ։ Բուլղարիայի կառավարության և խորհրդարանի նկատմամբ վստահության մակարդակը մնում է պատմականորեն ցածր մակարդակի մոտ, ինչը ևս մեկ ցուցանիշ է երկրի առջև ծառացած լուրջ քաղաքական և ինստիտուցիոնալ ճգնաժամի»,- AFP-ին ասել է «Market Links» սոցիոլոգիական գործակալության տնօրեն Դոբրոմիր Ժելիազկովը։
Անցյալ շաբաթ նախագահ Ռումեն Ռադևն աջակցություն էր հայտնել ցուցարարներին, իսկ կառավարությանը կոչ արել հրաժարական տալ։
Թարգմանությունը՝ Էմմա Չոբանյանի
