Թրամփը հայտարարել է Վենեսուելայի ափերի մոտ նավթատարի առգրավման մասին. ՏԵՍԱՆՅՈՒԹ

ԱՄՆ նախագահ Դոնալդ Թրամփը հայտարարել է, որ ամերիկյան իշխանությունները Վենեսուելայի ափերի մոտ առգրավել են «շատ մեծ» նավթատար, հաղորդում է Politico-ն: Թրամփն այն անվանել է «ԱՄՆ-ի կողմից երբևէ առգրավված ամենամեծ նավթատարը»: Սպիտակ տան ղեկավարը նշել է, որ նավը բռնագրավվել է «շատ լավ պատճառով», բայց չի մանրամասնել: Իրավիճակին ծանոթ աղբյուրը հայտնել է, որ նավթատարն ուղևորվում էր դեպի Կուբա, որտեղ պետական ​​Cubametales ընկերությունը ծրագրում էր այն վաճառել ասիական էներգետիկ բրոքերներին, գրում է The Insider-ը։

ԱՄՆ գլխավոր դատախազ Փեմ Բոնդին X-ում հաստատել է, որ ՀԴԲ-ն, Ներքին անվտանգության նախարարության հետաքննության ծառայությունը և Առափնյա պահպանությունը կատարել են պատժամիջոցների տակ գտնվող Վենեսուելայից և Իրանից նավթ տեղափոխող նավն առգրավելու օրդերը։

Բոնդին նշել է, որ «նավթատարը տարիներ շարունակ ենթարկվել է ԱՄՆ պատժամիջոցների՝ օտարերկրյա ահաբեկչական կազմակերպություններին աջակցող նավթի ապօրինի առևտրի ցանցում ներգրավվածության պատճառով»։

Վենեսուելայի կառավարությունը դատապարտել է ԱՄՆ զինվորականների կողմից նավթատար նավի վրա հարձակումը: Երկրի Արտաքին գործերի նախարարության հրապարակված հայտարարության մեջ միջադեպը որակվել է որպես «անամոթ կողոպուտ և միջազգային ծովահենության ակտ»:

«Վենեսուելայի դեմ շարունակվող ագրեսիայի իրական պատճառներն այժմ պարզ են դառնում: Խոսքը միգրացիայի մասին չէ: Խոսքը թմրանյութերի ապօրինի շրջանառության մասին չէ: Խոսքը ժողովրդավարության մասին չէ: Խոսքը մարդու իրավունքների մասին չէ: Խոսքը միշտ մեր բնական պաշարների, մեր նավթի, մեր էներգիայի մասին է՝ ռեսուրսներ, որոնք բացառապես պատկանում են Վենեսուելայի ժողովրդին»,- ասվում է հայտարարության մեջ:

Kpler-ի նավթային վերլուծաբան Մեթ Սմիթը նշել է, որ առգրավված նավը, ենթադրաբար, Պանամայի դրոշի ներքո նավարկող Skipper լցանավն է, որն առևտրային նպատակներով չէր հետևվում և, հավանաբար, ավտոմատ նույնականացման համակարգն անջատված է եղել։

ԱՄՆ ֆինանսների նախարարության համաձայն՝ Skipper-ը գրանցված է Մարշալյան կղզիների Triton Navigation ընկերության անունով։ 2022 թվականին գերատեսչությունը Triton-ը դասել է լիբանանյան «Հըզբոլլահ»-ին աջակցող «նավթի մաքսանենգության ցանցի համար կարևոր նավագնացության ընկերություններից» մեկի շարքին։

Լցանավի առգրավումը տեղի է ունեցել Politico-ին տված հարցազրույցից երկու օր անց, որում Թրամփը հրաժարվել էր բացառել Վենեսուելա զորքեր ուղարկելու հնարավորությունը՝ նախագահ Նիկոլաս Մադուրոյին տապալելու համար: Թրամփի վարչակազմն ամիսներ շարունակ ճնշում է գործադրել Մադուրոյի վրա՝ իշխանությունն ընդդիմությանը հանձնելու համար, այդ թվում՝ պատժամիջոցները վերականգնելու և Կարիբյան ավազանում ԱՄՆ ռազմական ներկայությունը մեծացնելու միջոցով: Թրամփը հայտարարել է, որ ԱՄՆ-ը կպահի լցանավից առգրավված նավթը։

Դեկտեմբերի սկզբին հաղորդվել էր, որ Վենեսուելայի նախագահ Նիկոլաս Մադուրոն խնդրել է պահպանել 200 միլիոն դոլարի անձնական ակտիվները, բարձրաստիճան պաշտոնյաների համար համաներման երաշխիքներ և բարեկամական երկրում անվտանգ ապաստան՝ որպես ԱՄՆ նախագահ Դոնալդ Թրամփի հետ հրաժարական տալու և երկիրը լքելու հնարավոր գործարքի մաս։

Թարգմանությունը՝ Էմմա Չոբանյանի