29.07.2026 | 00:56
«Արարատ-Արմենիան» դուրս եկավ Չեմպիոնների լիգայի որակավորման երրորդ փուլ. ՏԵՍԱՆՅՈՒԹ
Սևանում հայտնաբերվել է 62 ձկնորսական ցանց․ սիգի որսի արգելքի վերահսկումը խստացվել է
Տնտեսություն
10.12.2025 | 21:08
Սևանա լճում սիգի արդյունագործական որսի խստիվ արգելքի ընթացքում իրականացվող ուժեղացված վերահսկողական գործողությունների ընթացքում էկոպարեկային ծառայությունը հայտնաբերել և լճից դուրս է բերել 62 ապօրինի ձկնորսական ցանց, որոնցից էլ՝ շուրջ 20 կգ սիգ։ Պաշտոնյաները կրկին հորդորում են բնակչությանը զերծ մնալ ապօրինի որսից՝ հիշեցնելով, որ խախտումների համար սահմանված է խիստ վարչական և քրեական պատասխանատվություն։ Այս մասին տեղեկացնում են Էկոպարեկային ծառայությունից:
«Չնայած որսի կանոնները պահպանելու՝ ազգաբնակչությանն ուղղված բազմաթիվ հորդորներին, կոչերին այդուհանդերձ Էկոպարեկային ծառայության աշխատակիցների կողմից
Գեղարքունիքի մարզի Ծովագյուղ բնակավայրին հարող ջրային տարածքից դուրս է բերվել 62 հատ ձկնորսական ցանց և այդ ցանցերից էլ՝ շուրջ 20 կգ սիգ տեսակի ձուկ: Կազմվել են համապատասխան արձանագրություններ, հայտնաբերված ձկնորսական ցանցերը կտեղափոխվեն պահպանվող տարածք:
Ազգաբնակչությանը ևս մեկ անգամ հորդորում ենք զերծ մնալ ապօրինի գործողություններից։ Որսի կանոնները խախտելու, ինչպես նաև ապօրինի որսի դեպքում նախատեսվում է օրենքով սահմանված խիստ վարչական ու քրեական պատասխանատվություն:
Սևանի ձկնային պաշարների պահպանությունը մեր հիմնարար նպատակներից և ռազմավարական առաջնահերթություններից է և որսի խստիվ արգելքի որոշումն ուղղված է սիգի բնական վերարտադրությանն աջակցելուն՝ ապահովելով լճի ձկնային պաշարների կայուն և արդյունավետ վերականգնումը։
Սիգ ձուկը Հայաստանի Հանրապետության պարենային անվտանգության կարևորագույն մասն է և պետք է խնդրին մոտենալ այդ գիտակցումով»,- ասված է հաղորդագրությունում։
