28.04.2026 | 13:26
Աշխարհի ամենաթանկ ֆուտբոլային ակումբները
Գալուզինը Բաքվում ընդգծել է 11 ռուսաստանցիների ազատ արձակման կարևորությունը
Քաղաքականություն
10.12.2025 | 22:13
Ռուսաստանի արտաքին գործերի փոխնախարար Միխայիլ Գալուզինն ադրբեջանական կողմին փոխանցել է Բաքվում ձերբակալված ՌԴ 11 քաղաքացիների ազատ արձակման կարևորությունը։ Այս մասին ասվում է ՌԴ ԱԳՆ հայտարարության մեջ՝ Բաքվում ռուս-ադրբեջանական քաղաքական խորհրդակցությունների արդյունքներով, գրում է ՏԱՍՍ-ը։
«Ռուսական կողմն ընդգծել է հունիսի վերջին և հուլիսի սկզբին Բաքվում ձերբակալված ՌԴ 11 քաղաքացիների շուտափույթ ազատ արձակման կարևորությունը»,- նշել է նախարարությունը։
Բացի այդ, դեկտեմբերի 8-ից 11-ը Բաքվում տեղի ունեցած ռուս-ադրբեջանական խորհրդակցությունների ժամանակ Գալուզինն Ադրբեջանի փոխարտգործնախարար Սամիր Շարիֆովի հետ քննարկել է Բաքվի և Երևանի միջև հարաբերությունների կարգավորումը և այդ հարցում Մոսկվայի աջակցության հարցերը։
«Մանրամասն դիտարկվել են մի շարք տարածաշրջանային հարցեր, այդ թվում՝ ադրբեջանա-հայկական հարաբերությունների կարգավորումը և Ռուսաստանի հնարավոր աջակցությունն այս գործընթացին՝ հիմնվելով 2020-2022 թվականներին ձեռք բերված բարձր մակարդակի եռակողմ համաձայնությունների համալիրի վրա»,- նշել է նախարարությունը։
Ադրբեջանական լրատվամիջոցների հաղորդմամբ՝ Գալուզինը Բաքվում հանդիպել է Ադրբեջանի նախագահի օգնական, նախագահի աշխատակազմի արտաքին քաղաքականության բաժնի ղեկավար Հիքմեթ Հաջիևի հետ։
«Ես հանդիպում անցկացրեցի Ռուսաստանի փոխարտգործնախարար Միխայիլ Գալուզինի հետ։ Մենք մտքեր ենք փոխանակել երկկողմ, տարածաշրջանային և միջազգային հարցերի շուրջ»,- գրել է Հաջիևը սոցցանցերում։
Թարգմանությունը՝ Էմմա Չոբանյանի
