Խաղաղության Նոբելյան մրցանակի վենեսուելացի դափնեկիրը չի մասնակցել մրցանակաբաշխությանը

Վենեսուելայի ընդդիմության առաջնորդ Մարիա Կորինա Մաչադոն արժանացել է Նոբելյան խաղաղության մրցանակին՝ երկրում ժողովրդավարություն հաստատելու իր ջանքերի համար, և նախատեսվում էր, որ մրցանակը պաշտոնապես կստանա չորեքշաբթի կայանալիք արարողության ժամանակ, գրում է BBC-ի ռուսական ծառայությունը։։

Երեքշաբթի Նոբելյան ինստիտուտը չեղարկել է Մարիա Կորինա Մաչադոյի մամուլի ասուլիսը՝ նշելով, որ «գաղափար չունի» նրա գտնվելու վայրի մասին։

Ալֆրեդ Նոբելի դիմանկարով դիպլոմը և ոսկե մեդալը ստացել է դափնեկրի դուստրը՝ Անա Կորինա Սոսա Մաչադոն։ Նա նաև բեմում ելույթ է ունեցել մոր անունից։

«Այս մրցանակը խորը իմաստ ունի. այն աշխարհին հիշեցնում է, որ ժողովրդավարությունը կարևոր է։ Եվ ամենակարևոր բանը, որ մենք՝ վենեսուելացիներս, կարող ենք առաջարկել աշխարհին, այս երկար և դժվարին ճանապարհին սովորած դասն է. ժողովրդավարություն ունենալու համար մենք պետք է պատրաստ լինենք պայքարել ազատության համար։ Ազատությունն ընտրություն է, որը պետք է վերահաստատվի ամեն օր՝ չափվելով այն պաշտպանելու մեր պատրաստակամությամբ և քաջությամբ»,- ասել է Մաչադոն։

Նոբելյան ինստիտուտն ավելի վաղ հայտարարել էր, որ մրցանակի դափնեկիրն անձամբ կմասնակցի արարողությանը, սակայն երեքշաբթի տարածված մամուլի հաղորդագրության մեջ նշվում է. «Մարիա Կորինա Մաչադոն հարցազրույցում նշել է, թե որքան դժվար կլինի Օսլո ուղևորությունը: Հետևաբար, այս պահին մենք չենք կարող լրացուցիչ տեղեկություններ տրամադրել այն մասին, թե երբ և ինչպես նա կժամանի Նոբելյան խաղաղության մրցանակի հանձնման արարողությանը»:

Ավելի ուշ պարզաբանվել է, որ Մարիա Կորինա Մաչադոն պետք է Օսլո ժամանի չորեքշաբթի երեկոյան կամ հինգշաբթի առավոտյան՝ արարողությունից հետո։

Մաչադոն թաքնվում է 2024 թվականի ընտրություններից ի վեր, որոնց արդյունքները, ըստ Մաչադոյի և նրա կողմնակիցների, կեղծվել են։

Վենեսուելացի ընդդիմադիր գործիչը պարբերաբար տեսաուղերձներ է հրապարակում սոցիալական ցանցերում, բայց սովորաբար չեզոք սպիտակ պատի ֆոնին. նրա գտնվելու վայրն այժմ անհայտ է։

Թարգմանությունը՝ Էմմա Չոբանյանի