27.04.2026 | 23:25
ՔԿ նախագահ Արթուր Պողոսյանի մասին գրառման համար ֆեյսբուքյան օգտատիրոջը մեղադրանք է առաջադրվել
ՀՀ ԱԺ նախագահի կարծիքով՝ առաջիկայում կսահմանազատվի հայ-ադրբեջանական սահմանի ևս մեկ հատված
Քաղաքականություն
10.12.2025 | 17:38
Հայաստանի Ազգային ժողովի նախագահ Ալեն Սիմոնյանի կարծիքով՝ մոտ ապագայում կսահմանազատվի հայ-ադրբեջանական սահմանի ևս մի հատված։
«Արմենպրես»-ի հաղորդմամբ՝ այս մասին Ալեն Սիմոնյանն ասել է Մարդու իրավունքների պաշտպանության միջազգային օրվա առթիվ կազմակերպված միջոցառման շրջանակներում ունեցած ճեպազրույցի ժամանակ։
«Պետք է ասեմ, որ ինչ-որ հարցերում մենք ենք շտապում, ինչ-որ հարցերում՝ ադրբեջանական կողմը, բայց գործընթացը շարունակվում է, և ես կարծում եմ, որ մոտ ապագայում մենք ինչ-որ մի մաս ևս կսահմանազատենք»,- ասել է Սիմոնյանը՝ չհստակեցնելով, թե ո՞ր հատվածի մասին է խոսքը։
Անդրադառնալով ժամկետներին՝ ԱԺ նախագահը հնարավոր է համարել, որ գործընթացը տեղի ունենա գալիք տարվա առաջին եռամսյակում։
Հայաստանն ու Ադրբեջանը 2024 թվականի հունիսին հայտարարեցին սահմանազատման առաջին փուլի ավարտի մասին։ Առաջին փուլով Տավուշի հատվածում սահմանազատվել է սահմանի 12.6 կիլոմետր հատվածը։ 2025 թվականի հունվարին Հայաստանի և Ադրբեջանի սահմանազատման հանձնաժողովները պայմանավորվել են շարունակել սահմանազատումը հյուսիսային հատվածից՝ Հայաստանի Հանրապետության, Ադրբեջանի Հանրապետության և Վրաստանի սահմանների հատման կետից և այնուհետև հարավային ուղղությամբ՝ հյուսիսից հարավ մինչև Հայաստանի Հանրապետության և Ադրբեջանի Հանրապետության սահմանը Իրանի Իսլամական Հանրապետության հետ։ Հայաստանի վարչապետ Նիկոլ Փաշինյանը չի բացառել,որ կողմերը կարող են սահմանազատման աշխատանքներ իրականացնել այն հատվածներում, որտեղով պետք է անցնի «Թրամփի ուղի»-ն, որի գործարկման մասին պայմանավորվածությունը ձեռք է բերվել օգոստոսի 8-ին Վաշինգտոնում, և որի շուրջ միասին աշխատում են Հայաստանն ու Միացյալ Նահանգները։
