01.02.2026 | 20:00
Մեղրիի լեռնանցքում սաստիկ բուք է
Բրյուսելը ռուսական ակտիվների սառեցմանն ուղղված արտակարգ օրենք է պատրաստում. Financial Times
Քաղաքականություն
10.12.2025 | 15:42
Եվրոպական երկրները մտադիր են արագացնել շուրջ 210 միլիարդ եվրո արժողությամբ ռուսական ակտիվների անժամկետ սառեցման մասին օրենքի ընդունումը: Financial Times-ը, հղում անելով աղբյուրներին, գրում է, որ սա արվում է Հունգարիայի վարչապետ Վիկտոր Օրբանի կողմից ԵՄ առաջիկա գագաթնաժողովում հնարավոր վետոյից խուսափելու համար, գրում է The Insider-ը։
Օրենքի նախագիծը նախատեսում է արտակարգ լիազորությունների կիրառում: Աղբյուրների համաձայն՝ ԵՄ ղեկավարությունը ձգտում է պահպանել Ռուսաստանի վրա ճնշումը՝ Ռուսաստանի և Ուկրաինայի միջև հակամարտությունը խաղաղ ճանապարհով լուծելու շարունակական ջանքերի ֆոնին:
Այս հարցը դեկտեմբերի 18-ին կայանալիք ԵՄ առաջնորդների գագաթնաժողովի օրակարգում է։ Եվրոպական խորհրդի նախագահ Անտոնիո Կոշտան չի բացառել նիստը մինչև դեկտեմբերի 20-ը երկարաձգելու հնարավորությունը, «անհրաժեշտության դեպքում, մինչև դրական արդյունքի հասնեն»։ Politico-ն նշում է, որ սա բացառություն կլինի «ոսկե կանոնից», որ լավ գագաթնաժողովը տևում է մեկ օր։
Հաղորդվում է նաև, որ ԵՄ դեսպաններն այս շաբաթ ակտիվորեն կաշխատեն՝ անցկացնելով երեք հանդիպում՝ փորձելով համոզել Բելգիային աջակցել Ուկրաինայի ֆինանսավորման համար ռուսական ակտիվների օգտագործմանը։
Նախկինում հաղորդվել էր, որ ԵՄ-ն գտել է իրավական մեխանիզմ՝ ռուսական ակտիվները անորոշ ժամանակով սառեցնելու համար՝ առանց բոլոր անդամ պետությունների միաձայն համաձայնության: ԵՄ պայմանագրերը պարունակում են հոդված, որը թույլ է տալիս նման միջոցներ ձեռնարկել լուրջ տնտեսական ցնցումների պայմաններում, որոնք Բրյուսելը համարում է Ուկրաինայի պատերազմը և Ռուսաստանի «հիբրիդային ագրեսիան»: Ներկայում ռուսական ակտիվները սառեցնելու որոշումը երկարաձգվում է յուրաքանչյուր վեց ամիսը մեկ:
Թարգմանությունը՝ Էմմա Չոբանյանի
