10.12.2025 | 16:46
Ուկրաինան ռուսական «ստվերային նավատորմին» պատկանող նավ է կալանել. այն Ղրիմից գյուղատնտեսական արտադրանք էր տեղափոխում
Պեսկովը հայտարարել է, որ ՌԴ-ն աշխատում է խաղաղության, այլ ոչ թե հրադադարի վրա
Քաղաքականություն
10.12.2025 | 16:03
Ռուսաստանին անհրաժեշտ է կայուն և երկարաժամկետ խաղաղություն՝ ստորագրված փաստաթղթերի հիման վրա։ Այս մասին հայտարարել է Ռուսաստանի նախագահի մամուլի քարտուղար Դմիտրի Պեսկովը՝ մեկնաբանելով Ուկրաինայի նախագահ Վլադիմիր Զելենսկիի հայտարարությունը «էներգետիկ զինադադարի» պատրաստակամության մասին, գրում է Ինտերֆաքսը։
«Մենք աշխատում ենք խաղաղության, այլ ոչ թե հրադադարի վրա։ Համապատասխան փաստաթղթերի ստորագրման միջոցով ձեռք բերված կայուն, երաշխավորված, երկարաժամկետ խաղաղությունը բացարձակ առաջնահերթություն է»,- լրագրողներին ասել է Պեսկովը՝ պատասխանելով Կրեմլի կողմից Զելենսկիի՝ «էներգետիկ հրադադարի» պատրաստակամության մասին հայտարարության գնահատման վերաբերյալ հարցին։
Երեքշաբթի երեկոյան Զելենսկին հայտարարել էր երկրում երկու-երեք ամսվա ընթացքում ընտրություններ անցկացնելու պատրաստակամության (եթե քվեարկության անվտանգությունն ապահովվի) և Ռուսաստանի հետ էներգետիկ զինադադարի պատրաստակամության մասին, եթե ռուսական կողմը ևս պատրաստ լինի դրան։
Պեսկովը նաև նշել է, որ ռուսական կողմը դեռևս որևէ մեկի հետ չի քննարկել Ուկրաինայի նախագահ Վլադիմիր Զելենսկիի հայտարարությունը երկրում նախագահական ընտրություններ անցկացնելու պատրաստակամության մասին։
«Ոչ, մենք ժամանակ չենք ունեցել դա որևէ մեկի հետ քննարկելու։ Հայտարարությունը բավականին նոր է։ Դա այն է, ինչի մասին խոսել է նախագահ Պուտինը։ Դա այն է, ինչի մասին վերջերս խոսել է նախագահ Թրամփը։ Կտեսնենք, թե ինչպես կզարգանան իրադարձություններն այս առումով»,- ասել է նա լրագրողներին՝ պատասխանելով հարցին՝ արդյո՞ք Կրեմլը քննարկել է հայտարարությունն իր ամերիկացի գործընկերների հետ։
Թարգմանությունը՝ Էմմա Չոբանյանի
