29.06.2026 | 23:29
Ալեն Սիմոնյանը պարգևատրել է պետական պահպանության ծառայության աշխատողներին
Վաշինգտոնն ու Կիևը խաղաղության ծրագրի շրջանակում քննարկում են ԵՄ-ին Ուկրաինայի անդամակցությունը՝ արդեն 2027 թվականին. The Washington Post
Քաղաքականություն
10.12.2025 | 16:57
Վաշինգտոնն ու Կիևը քննարկում են առաջարկ, որը թույլ կտա Ուկրաինային միանալ Եվրամիությանն արդեն 2027 թվականին՝ որպես ռուս-ուկրաինական պատերազմին վերջ դնելու խաղաղության ծրագրի մաս։ Այս մասին գրում է The Washington Post սյունակագիր Դեյվիդ Իգնատիուսը՝ հղում անելով ամերիկացի և ուկրաինացի պաշտոնյաներին, փոխանցում է Meduza-ն։
Նա ընդգծում է, որ Ուկրաինայի արագ անդամակցությունը ԵՄ-ին անհանգստացնում է որոշ ԵՄ երկրների: Այնուամենայնիվ, Դոնալդ Թրամփի վարչակազմը կարծում է, որ կարող է հաղթահարել Ուկրաինայի անդամակցության հետ կապված Հունգարիայի դիմադրությունը։
ԵՄ անդամակցությունը, ենթադրաբար, կնպաստի առևտրին և ներդրումներին, ինչպես նաև Ուկրաինայում կոռուպցիայի դեմ պայքարին։
Բանակցություններում քննարկվում է նաև «հրադադարի գծի ամբողջ երկայնքով»՝ Դոնեցկի մարզից մինչև Խերսոն և Զապորոժիե, ապառազմականացված գոտի ստեղծելու առաջարկը։
«Այս ապառազմականացված գոտուց այն կողմ կլինի մեկ այլ՝ ավելի խորը գոտի, որտեղ արգելվելու է ծանր զենքը։ Այս գոտին ուշադիր կհսկվի՝ նման Հյուսիսային և Հարավային Կորեաները բաժանող ապառազմականացված գոտուն»,- գրում է Իգնատիուսը։
Նրա խոսքով՝ այլ գաղափարների թվում է Զապորոժիեի ատոմակայանը ԱՄՆ վերահսկողությանը հանձնելը։
ԱՄՆ խաղաղության ծրագրի առաջին տարբերակի համաձայն, որը հրապարակվել էր լրատվամիջոցներում նոյեմբերի 20-ին, Ուկրաինան իր Սահմանադրությամբ ամրագրում է, որ չի միանա ՆԱՏՕ-ին, և ՆԱՏՕ-ն պարտավորվում է ապագայում չընդունել Կիևին իր շարքերը։
Այնուամենայնիվ, Ուկրաինան իրավունք կունենա միանալ Եվրամիությանը։ Այն նաև նշում էր, որ Զապորոժիեի ատոմակայանը կգործի Ատոմային էներգիայի միջազգային գործակալության հսկողության ներքո, իսկ արտադրված էլեկտրաէներգիան հավասարապես կբաժանվի Ռուսաստանի և Ուկրաինայի միջև՝ 50/50 հարաբերակցությամբ։
Թարգմանությունը՝ Էմմա Չոբանյանի
