Կամբոջայում և Թաիլանդում սահմանային բախումների պատճառով կես միլիոնից ավելի մարդ է տարհանվել

Սահմանային հակամարտության վերսկսումից ի վեր ավելի քան 500,000 մարդ լքել է իրենց տները՝ անվտանգ վայրեր փնտրելով Թաիլանդում և Կամբոջայում։ Երկու երկրների կառավարությունները հայտարարել են, որ սա գերազանցում է այս տարեսկզբին նմանատիպ բախումների ժամանակ տարհանվածների ընդհանուր թիվը, գրում է France 24-ը։

«Մեծ թվով քաղաքացիական անձինք ստիպված են եղել տարհանվել այն պատճառով, ինչը մենք գնահատել ենք որպես նրանց անվտանգությանը սպառնացող անմիջական սպառնալիք։ Ավելի քան 400,000 մարդ տեղափոխվել է անվտանգ ապաստարաններ յոթ նահանգներում։ Մենք ցանկանում ենք կանխել 2025 թվականի հուլիսին քաղաքացիական անձանց վրա հարձակումների կրկնությունը»,- լրագրողներին ասել է Թաիլանդի պաշտպանության նախարարության խոսնակ Սուրասանտ Կոնգսիրին։

Կամբոջայում «101,229 մարդ տարհանվել է անվտանգ ապաստարաններ և հարազատների տներ», իր հերթին, լրագրողներին ասել է պաշտպանության նախարարության խոսնակ Մալի Սոչեատան։

Հարավարևելյան Ասիայի հարևանները վիճարկում են իրենց 800 կիլոմետրանոց (500 մղոն) սահմանի՝ գաղութային դարաշրջանի սահմանազատումը, որտեղ պատմական տաճարների նկատմամբ մրցակցային պահանջները վերածվել են զինված հակամարտության։ Այս շաբաթվա բախումներն ամենամահացուն էին հուլիսին տեղի ունեցած հնգօրյա մարտերից ի վեր, որոնց հետևանքով տասնյակ մարդիկ զոհվեցին, շուրջ 300,000 մարդ տեղահանվեց սահմանի երկու կողմում՝ նախքան ԱՄՆ նախագահ Դոնալդ Թրամփի միջնորդությամբ անկայուն զինադադարի կնքումը։

Կողմերը միմյանց են մեղադրում վերսկսված մարտական ​​գործողությունները հրահրելու համար, որոնք երեքշաբթի տարածվել են Թաիլանդի և Կամբոջայի հինգ նահանգներում։

Թարգմանությունը՝ Էմմա Չոբանյանի