18.08.2026 | 23:01
Չեմ հիշում իմ աշխատանքային պարտականություններում օրենքով ինչ էր նախատեսված. Չախոյան. ՏԵՍԱՆՅՈՒԹ
«Կռուգլյակ» փայտից տաղավար, մեջը՝ «6 կտոր կենդանի»․ ինչ է գրված Ճամբարակ համայնքի ամանորյա ձևավորման պայմանագրում
Հասարակություն
09.12.2025 | 19:18
Factor.am-ն ուսումնասիրում է հանրապետության տարբեր համայնքներում ամանորյա զարդարանքի համար հայտարարված մրցույթները, հաղթած ընկերություններն ու իրականացվող ծախսերը։
Գեղարքունիքի մարզի Ճամբարակ համայնքում և 15 բնակավայրերում ամանորյա և սուրբծննդյան միջոցառումների կազմակերպման համար 12 միլիոն 980 հազար դրամ է հատկացվել։ Գնումն իրականացրել է «Արամյան Արշակ Արամի» ԱՁ-ն։
Անհատ ձեռնարկատերը պարտավոր է լուսավորել ու ձևավորել Ճամբարակի կենտրոնական հրապարակի և այգու 50 ծառեր, Ճամբարակ համայնքի 15 բնակավայրում, Վերին Ճամբարակ և Ներքին Ճամբարակ թաղամասերի կենտրոնում տեղադրել արհեստական տոնածառ ու զարդարել, Ճամբարակի համայնքապետարանի շենքի ֆասադն ու 3 եղևնիները ևս զարդարել։
«Սուրբծննդյան տաղավարը պատրաստված լինի «կռուգլյակ» փայտից: Տաղավարի ներսում լինեն Հիսուս Քրիստոսի, Մարիամ Աստվածածնի, Հովսեփի կերպարներով և 6 կտոր կենդանիներ՝ 2 ոչխար, 3 գառ, 1 էշ: Կենտրոնական այգու 300 մետր ցանկապատի վրա փակցված լինի երկշերտ լուսադիոդային դեղին լենտ: Մուտքից մինչև գլխավոր տոնածառ ընկած հատված վերևից ծածկված լինի լուսադիոդային խիտ ցանցով: Ճամբարակ համայնքի գլխավոր մուտքի մոտ, Ճամբարակի համայնքապետարանի վարչական շենքի հարակից տարածքում, Նարեկացի փողոցում, Գարդման փողոցում, կենտրոնական այգում տեղադրված լինի մետաղական կոնստրուկցիայով պատրաստված «2026» թիվը»,- գրված է պայմանագրում, որում ձևակերպումները, մեղմ ասած, աչքի չեն ընկնում հայոց լեզվի քերականական կանոնների պահպանմամբ։
Նշվում է նաև, որ 5 ժամ տևողությամբ հարմերգ կկազմակերպվի, որի ժամանակ ելույթ կունենա նաև Տաթև Ասատրյանը։ 1 ժամ ելույթ կունենա նաև հայկական ժողովրդական մոդեռն բենդ՝ կենդանի կատարմամբ։ Իսկ տոնական տրամադրություն կհաղորդի «հայտնի ու սիրված DJ», որի անունը նշված չէ։ Այս ամենի համար պետք է ապահովել շարժական բեմահարթակ։
«Համերգը նախատեսվում է իրականացնել դեկտեմբերի 20-27 ընկած ժամանակահատվածում՝ ժամը 18:00-ից Ճամբարակի կենտրոնական այգում: Համերգի պատշաճ անցկացման համար հրավիրել հաղորդավար: Հաղորդավարի թեկնածությունը համաձայնեցնել պատվիրատուի հետ»,- նշված է տեխնիկական բնութագրում։
Ապամոնտաժված զարդարանքները և պարագաներն անհատ ձեռնարկատերը պետք է հանձնի Ճամբարակի համայնքապետարանին։
Արփի Հակոբյան
