Թրամփը հայտարարել է, որ Եվրոպան շատ առումներով վատ է աշխատում

ԱՄՆ նախագահ Դոնալդ Թրամփը Politico-ին տված հարցազրույցում, ի թիվս այլ հարցերի, քննարկել է Ուկրաինայի պատերազմը, ԱՄՆ-ի ջանքերը հակամարտությունը կարգավորելու հարցում և Վլադիմիր Զելենսկիին, գրում է BBC-ի ռուսական ծառայությունը։

Սպիտակ տան ղեկավարը Ուկրաինայի պատերազմն անվանել է «մեծ խնդիր» և անմիջապես հավելել, որ եթե ինքը կրկին նախագահ չդառնար, խնդիրն ավելի մեծ կլիներ, և նույնիսկ կարող էր Երրորդ համաշխարհային պատերազմ սկսվել։ Այնուհետև Թրամփն անդրադարձել է հակամարտությունների կարգավորման հարցին։ Նա կրկնել է կիրակի օրը իր արած պնդումը, որ Վլադիմիր Զելենսկին դեռևս չի կարդացել պատերազմը դադարեցնելու ծրագրի տեքստը։

«Եթե նրանք չկարդան համաձայնագրերը, հնարավոր համաձայնագրերը․․․ Գիտեք՝ Ռուսաստանի հետ դժվար է, քանի որ Ռուսաստանն առավելություն ունի։ Եվ նրանք միշտ էլ առավելություն ունեն։ Նրանք շատ ավելի մեծ են։ Այդ առումով նրանք շատ ավելի ուժեղ են»,- ասել է Թրամփը։

Նա հավելել է, որ բարձր է գնահատում «ուկրաինացի ժողովրդին և Ուկրաինայի զինված ուժերին իրենց քաջության, պայքարի և այլնի համար», «բայց որոշ դեպքում չափը սովորաբար հաղթում է»։

Politico-ի լրագրողը հարցին՝ որքանո՞վ է իրատեսական Եվրոպայի մտադրությունը՝ աջակցել Կիևին մինչև պատերազմում հաղթանակը, ԱՄՆ նախագահը պատասխանել է, որ «Եվրոպան շատ առումներով վատ է աշխատում»։

«Նրանք արդյունքներ չեն ստանում։ Մենք խոսում ենք Ուկրաինայի մասին։ Նրանք խոսում են, բայց արդյունքներ չեն ստանում։ Եվ պատերազմը շարունակվում է անվերջ»,- եզրափակել է Սպիտակ տան ղեկավարը։

Պատասխանելով լրագրողի հարցին՝ արդյո՞ք ժամանակն է, որ Ուկրաինան ընտրություններ անցկացնի, Թրամփը պատասխանել է. «Այո, կարծում եմ՝ ժամանակն է»։

Թարգմանությունը՝ Էմմա Չոբանյանի