30.10.2026 | 23:30
Հայաստանի մի շարք հասցեներում էլեկտրաէներգիայի անջատումներ կլինեն
Paramount-ն ընդդեմ Netflix-ի. ընկերությունը Թրամփին խոստացել է «փոխել» CNN-ը, եթե գնի Warner Bros.-ը
Քաղաքականություն
09.12.2025 | 23:16
Paramount-ի գործադիր տնօրեն Դեյվիդ Էլիսոնը ԱՄՆ նախագահ Դոնալդ Թրամփի վարչակազմին խոստացել է, որ եթե գնի Warner Bros. Discovery-ն, ապա «արմատական փոփոխություններ» կիրականացնի CNN-ում՝ հեռուստաալիք, որը նյարդայնացնում է ԱՄՆ նախագահին։ Այս մասին գրում է The Wall Street Journal-ը՝ հղում անելով աղբյուրներին։
Paramount-ը մրցում է Netflix հոսքային ծառայության հետ Warner Bros.-ի ձեռքբերման համար։ Դեկտեմբերի 5-ին Netflix-ը հայտարարեց, որ գնում է Warner Bros.-ը 82,7 միլիարդ դոլարով, չնայած գործարքը ենթակա է հակամենաշնորհային հաստատման։
Paramount-ի առաջարկն ավելին է՝ 108 միլիարդ դոլար՝ մեկ բաժնետոմսի համար 30 դոլար գնով։ Netflix-ը ցանկանում է գնել միայն Warner Bros. կինոստուդիաները և HBO Max հոսքային ծառայությունը, իսկ Paramount-ը՝ ամբողջ հոլդինգային ընկերությունը, ներառյալ՝ դրա մալուխային ալիքները (այդ թվում՝ CNN-ը), գրում է Meduza-ն։
Թրամփը հրապարակայնորեն չի աջակցել որևէ առաջարկի՝ ասելով, որ նրանցից ոչ ոք իր «առանձնապես մտերիմ ընկերը» չէ։ Նախագահին մոտ կանգնած աղբյուրի խոսքով՝ Թրամփը ցանկանում է, որ Paramount-ը և Netflix-ը մրցակցեն իր կողմից գործարքի հաստատման համար։
Warner Bros. Discovery-ի տնօրենների խորհուրդը հայտարարել է, որ կվերանայի Paramount-ի առաջարկը, բայց չի փոխի Netflix-ի հետ գործարքի վերաբերյալ իր առաջարկությունը։
Ըստ The Wall Street Journal-ի՝ Paramount-ը մի քանի ամիս պատրաստում էր Warner Bros.-ը գնելու առաջարկ և դեկտեմբերի սկզբին կատարեց վեցերորդ փորձը՝ առաջարկ ներկայացնելու հոլդինգային ընկերության նախագահ Դեյվիդ Զասլավին։
Paramount-ը ֆինանսավորում ստացավ Մերձավոր Արևելքի ինքնիշխան հիմնադրամներից և Affinity Partners ընկերությունից, որը պատկանում է Դոնալդ Թրամփի փեսային՝ Ջարեդ Քուշներին։ Սակայն Զասլավն արդեն իսկ ծրագրում էր մեդիա կայսրությունը բաժանել երկու ընկերության. մեկը կներառեր կինոստուդիաները և HBO Max-ը, իսկ մյուսը կկառավարեր մալուխային հեռուստատեսության բիզնեսը։ Ի վերջո, Warner Bros.-ը մերժեց Էլիսոնի առաջարկը՝ այն համարելով անհիմն, և դեկտեմբերի 5-ին հայտարարեց Netflix-ի հետ գործարքի մասին։
Թարգմանությունը՝ Էմմա Չոբանյանի
