30.10.2026 | 23:30
Հայաստանի մի շարք հասցեներում էլեկտրաէներգիայի անջատումներ կլինեն
Չինաստանում մահապատժի են ենթարկել China Huarong-ի նախկին գործադիր տնօրենին՝ կոռուպցիայի մեղադրանքով
Քաղաքականություն
09.12.2025 | 22:28
Չինաստանում մահապատժի են ենթարկել China Huarong-ի նախկին գործադիր տնօրենին՝ 1,1 միլիարդ յուանի (156 միլիոն դոլար) կաշառք ստանալու մեղադրանքով, հաղորդում է Bloomberg-ը: Բայ Տյանհույը մահապատժի էր դատապարտվել 2024 թվականի մայիսին, իսկ Գերագույն ժողովրդական դատարանը նրա դատավճիռն ուժի մեջ է թողել 2025 թվականի փետրվարին: 2021 թվականին Tianhui-ի ղեկավար Լայ Սյաոմինը մահապատժի է ենթարկվել նմանատիպ մեղադրանքներով, գրում է The Insider-ը։
Huarong-ը, որն այժմ հայտնի է որպես China Citic Financial Asset Management Co., Չինաստանի խոշորագույն ճգնաժամային պարտքերի կառավարիչներից է: 2021 թվականին ընկերությունը, որը զգալի վնասներ էր կրել, ձեռք է բերվել Citic Group-ի կողմից:
Վերջին տարիներին Պեկինը խստացրել է ֆինանսական հատվածի նկատմամբ վերահսկողությունը՝ երկրի տնտեսությունը կայունացնելու նպատակով: Այս միջոցառումների շրջանակում մի քանի բարձրաստիճան բանկիրներ դատապարտվել են մահապատժի, այդ թվում՝ Չինաստանի արդյունաբերական և առևտրային բանկի նախկին փոխնախագահ Չժան Հոնգլին և Չինաստանի բանկի նախկին նախագահ Լյու Լյանգեն: Դատապարտվածներից մի քանիսը ստացել են ժամանակավորապես հետաձգված դատավճիռներ, սակայն հատկապես ծանր վնաս պատճառելու մեջ մեղադրվողները մահապատժի են ենթարկվել։
Ըստ Amnesty International-ի՝ Չինաստանը տարեկան ավելի շատ մահապատիժներ է իրականացնում, քան որևէ այլ երկիր։ Չնայած հստակ թվեր հայտնի չեն, կազմակերպության վերջին զեկույցում գնահատվել է, որ 2023 թվականին մահապատժի են ենթարկվել հազարավոր մարդիկ։
2025 թվականին Չինաստանը մահապատժի է ենթարկել Կանադայի չորս քաղաքացու՝ թմրանյութերի հետ կապված մեղադրանքներով։ Մեղադրյալներն ունեցել են կրկնակի քաղաքացիություն, որը չինական իշխանությունները չեն ճանաչում։
Թարգմանությունը՝ Էմմա Չոբանյանի
