ԱՄՆ-ից արտաքսված ռուսների տեղափոխող ինքնաթիռը ժամանել է Մոսկվա. տղամարդկանց անմիջապես զինկոմի ծանուցումներ են հանձնել

Դեկտեմբերի լույս 9-ի գիշերը Կահիրեից Մոսկվա է ժամանել ԱՄՆ-ից արտաքսված Ռուսաստանի քաղաքացիների տեղափոխող ինքնաթիռը։ Այս մասին հաղորդում է «Агентство»-ն՝ հղում անելով Russian America for Democracy in Russia կազմակերպության ղեկավար Դմիտրի Վալուևին։ «Էխո»-ն նույնպես հաղորդել է արտաքսման չվերթի ժամանման մասին, որը վերջին մեկ տարվա ընթացքում երրորդն է, գրում է Current time-ը։

Վալուևի խոսքով՝ տղամարդկանց ժամանելուն պես զինկոմի ծանուցում են հանձնել։ Նա պարզաբանել է, որ դրանք, ամենայն հավանականությամբ, կապված են եղել զինվորական գրանցման հետ։ Դեռևս տեղեկություններ չկան ժամանողների շրջանում ձերբակալվածների մասին։

Ռուսները Եգիպտոսի մայրաքաղաք են տեղափոխվել Արիզոնայից՝ հատուկ չվերթով։ Եգիպտոսի մայրաքաղաքում արտաքսված ռուսներին հեռախոսներ և իրեր են տվել, ուղեկցել Մոսկվա մեկնող ինքնաթիռ, հայտնել է Վալուևը։

ԱՄՆ-ից ռուսների նախորդ երկու զանգվածային արտաքսումները տեղի են ունեցել 2025 թվականի հունիսին և օգոստոսին, բացի այդ, նաև անհատական ​​հիմունքներով արտաքսվողներ են եղել։

ԱՄՆ նախագահ Դոնալդ Թրամփի վարչակազմի իշխանության գալուց ի վեր անօրինական միգրանտների և ապաստան խնդրողների արտաքսման մակարդակը, որոնց դիմումները չեն ընդունվել, աճել է։ Սա վերաբերում է նաև Ռուսաստանի քաղաքացիներին։

Սեպտեմբերին ռուս ընդդիմադիր գործիչներ Վլադիմիր Կարա-Մուրզան, Յուլիա Նավալնայան և Իլյա Յաշինը դիմել էին Կանադայի վարչապետ Մարկ Քարնիին՝ կոչ անելով նրան ընդունել ընդդիմադիր տրամադրվածությամբ ռուսաստանցիներին, որոնք արտաքսվում են ԱՄՆ-ից՝ երկրում խստացվող ներգաղթային քաղաքականության պատճառով։

Թարգմանությունը՝ Էմմա Չոբանյանի