Ճապոնիան հրաժարվել է օգտագործել սառեցված ռուսական ակտիվները՝ Ուկրաինայի «փոխհատուցման վարկի» համար. Politico

Ճապոնիան մերժել է Եվրամիության առաջարկը՝ միանալու Ուկրաինայի ֆինանսավորման համար սառեցված ռուսական ակտիվներն օգտագործելու ծրագրին։ Այս մասին հաղորդում է Politico-ն՝ հղում անելով իր աղբյուրներին, փոխանցում է The Insider-ը։

Ճապոնիան ունի շուրջ 30 միլիարդ դոլարի արժողությամբ ռուսական ակտիվներ: Դեկտեմբերի 8-ին G7-ի ֆինանսների նախարարների հանդիպման ժամանակ Տոկիոն հստակեցրել է, որ մտադիր չէ դրանք օգտագործել Կիևին «փոխհատուցման վարկ» տրամադրելու համար։ Եվրոպացի դիվանագետի խոսքով՝ Ճապոնիայի ֆինանսների նախարար Սացուկի Կատայաման հղում է կատարել իրավական անորոշություններին։ Մի քանի այլ աղբյուրներ նույնպես նշում են, որ Ճապոնիայի դիրքորոշումը կապված է Միացյալ Նահանգների դիրքորոշման հետ, որը նույնպես դեմ է Ռուսաստանի սառեցված ակտիվների օգտագործմանը, և որը Տոկիոն չի ցանկանում անտեսել։

Ուկրաինային «փոխհատուցման վարկի» գաղափարը, որը կապահովվի սառեցված ռուսական ակտիվներով, այս աշնանն առաջարկել էր Եվրահանձնաժողովի նախագահ Ուրսուլա ֆոն դեր Լեյենը: Կենտրոնական բանկի ակտիվների մեծ մասը՝ մոտ 260 միլիարդ եվրո, պահվում է ԵՄ-ում, սակայն Բելգիայի իշխանությունները, որտեղ պահվում է միջոցների զգալի մասը, դեմ են այդ գաղափարին:

Բելգիայում մտավախություն ունեն, որ եթե Ռուսաստանի դեմ պատժամիջոցները վերացվեն, Մոսկվան կպահանջի միջոցները, և Բելգիան ստիպված կլինի մարել դրանք:

Ըստ Politico-ի՝ Եվրահանձնաժողովը ցանկանում է համաձայնության գալ այս հարցի շուրջ մինչև դեկտեմբերի 18-ին կայանալիք եվրոպական առաջնորդների գագաթնաժողովը: Բելգիան, մասնավորապես, պահանջում է, որ ԵՄ-ից դուրս գտնվող G7-ի մյուս երկրները նույնպես վարկ տրամադրեն Ուկրաինային՝ օգտագործելով իրենց մոտ պահվող սառեցված ռուսական ակտիվները: Բելգիայի վարչապետ Բարտ դե Վևերը կարծում է, որ G7-ի գործընկերների ակտիվ մասնակցությունը կնվազեցնի Բրյուսելի համար ռիսկերը, ինչպես նաև միայն Բելգիայի դեմ ուղղված պատասխան միջոցառումների հավանականությունը:

Թարգմանությունը՝ Էմմա Չոբանյանի