ՄԱԿ-ի դատարանն ընդունել է ՌԴ-ի հայցը Դոնեցկի և Լուգանսկի  բնակչության «ցեղասպանության» գործով

ՄԱԿ-ի Արդարադատության միջազգային դատարանն (UN International Court of Justice) ընդունել է «Դոնեցկի և Լուգանսկի մարզերի բնակչության նկատմամբ ցեղասպանության գործով» Ռուսաստանի կողմից ներկայացված հակընդդեմ հայցը, ասվում է դեկտեմբերի 8-ին հրապարակված մամուլի հաղորդագրության մեջ, գրում է Meduza-ն։

2025 թվականի դեկտեմբերի 5-ի որոշման հիման վրա դատարանը Ռուսաստանի հակընդդեմ հայցերը ճանաչել է «ընդունելի՝ որպես այդպիսին» և թույլ է տվել Ուկրաինային ներկայացնել իր պատասխանը, իսկ Ռուսաստանին՝ առարկությունները: Համապատասխան գրավոր հայտարարությունները ներկայացնելու վերջնաժամկետներ են սահմանվել 2026 թվականի դեկտեմբերի 7-ը (Ուկրաինայի համար) և 2027 թվականի դեկտեմբերի 7-ը (Ռուսաստանի համար):

Ռուսաստանն Ուկրաինային մեղադրում է Լուգանսկի և Դոնեցկի շրջաններում «ցեղասպանության» մեջ, մասնավորապես, արդարացնելով 2022 թվականին իր ներխուժումը։

Մի քանի օր անց՝ 2022 թվականի փետրվարի 26-ին, Ուկրաինան դիմում էր ներկայացրել Արդարադատության միջազգային դատարան (ICJ)՝ խնդրելով պատասխանատվության ենթարկել Ռուսաստանին հարձակումն արդարացնելու նպատակով «ցեղասպանություն» հասկացությունն աղավաղելու համար։ Հաջորդ երեք տարիների ընթացքում Ռուսաստանը հակադարձ առարկություններ է ներկայացրել այս գործով. ավելի քան 20 այլ պետություններ նույնպես միջամտության հայտարարություններ են ներկայացրել։

2024 թվականի նոյեմբերի 18-ին Ռուսաստանը հուշագիր է ներկայացրել՝ փոխանցելով իր հակապահանջները։ Դատարանի մամուլի հաղորդագրության համաձայն՝ Ուկրաինան վիճարկել է այդ հայցերի ընդունելիությունը որպես այդպիսին։ Դատարանը դեռևս չի քննել ցեղասպանության գործը ըստ էության։

Թարգմանությունը՝ Էմմա Չոբանյանի