Ադրբեջանի վարչապետը հայտարարել է, թե «Զանգեզուրի միջանցքը» կարևոր նշանակություն ունի Միջին միջանցքի, Հյուսիս-Հարավի շրջանակում

«Մոտ ապագայում Զանգեզուրի միջանցքը կարևոր  նշանակություն կունենա, որպես նոր տրանսպորտային երթուղի ինչպես Միջին միջանցքի, այնպես էլ Հյուսիս-Հարավ միջանցքի շրջանակներում»,- Ադրբեջանի Միլլի Մեջլիսի նիստում այս մասին հայտարարել է այդ երկրի վարչապետ Ալի Ասադովը։

Ըստ Ասադովի՝ Ադրբեջանն այժմ Եվրասիայի տրանսպորտային և լոգիստիկ կենտրոններից մեկն է։ Նա նաև ասել է, որ օգոստոսի 8-ին Ադրբեջանի նախագահ Իլհամ Ալիևի՝ ԱՄՆ կատարած այցի ընթացքում ստորագրված փաստաթղթերը, այդ թվում՝ Ադրբեջանի հիմնական մասի և Նախիջևանի միջև անարգել տրանսպորտային կապերի մասին համաձայնագիրը, կնպաստեն տարածաշրջանում կայուն խաղաղության ապահովմանը, միջազգային բեռնափոխադրումների տարանցիկ հնարավորություններին և տնտեսական զարգացմանը։

Միաժամանակ, Ասադովը հայտարարել է, որ Ադրբեջանում ռազմարդյունաբերությունն արագ զարգանում է, և կառավարության առջև դրված է արդյունաբերական կլաստեր ստեղծելու խնդիր։

«2026 թվականի պետական ​​բյուջեում պաշտպանության և ազգային անվտանգության հոդվածները կազմում են բյուջեի ընդհանուր ծախսերի մոտ 21%-ը (8,7 միլիարդ մանաթ): Այսօր Ադրբեջանում ռազմական արդյունաբերությունն արագ զարգանում է. այս ոլորտին տարիներ շարունակ հատկացվել են զգալի ռեսուրսներ և ուշադրություն: Ռազմական արտադրանքն արդեն արտահանվում է բազմաթիվ երկրներ: Նախագահը կառավարությանը հանձնարարել է ստեղծել արդյունաբերական կլաստեր՝ ներքին պահանջարկը և արտահանումը բավարարելու համար: Այս ուղղությամբ աշխատանքներն արդեն ընթացքի մեջ են»,- հավելել է նա:

Հիշեցնենք, որ Վաշինգտոնում օգոստոսի 8-ին ստորագրված համաձայնագրերով որևէ «Զանգեզուրի միջանցքի» մասին խոսք չկա։ Դրանցում նշվում է «Թրամփի երթուղու» (TRIPP) մասին, սակայն Բաքվի քարոզչամեքենան ու ադրբեջանցի պաշտոնյաները, Ադրբեջանի հետ կապված գործիչները շարունակում են «միջանցք» եզրույթն օգտագործել՝ խեղաթյուրելով նաև ստորագրված փաստաթղթերի բովանդակությունը ու այդ թեմայով միջոցառումներ կազմակերպել։

Թարգմանությունը՝ Էմմա Չոբանյանի