Իսրայելը նոր ավիահարվածներ է հասցրել Լիբանանին

Իսրայելի զինված ուժերը մի շարք ավիահարվածներ են հասցրել երկրի հարավում՝ վնասելով մի քանի տներ։ Այս մասին հաղորդում են Լիբանանի պետական ​​լրատվամիջոցները, փոխանցում է Al Jazeera-ն։

Ըստ տեղեկությունների՝ իսրայելական ինքնաթիռները «մի քանի ալիքով» հարվածել են Սաֆի լեռանը, Ջբաա քաղաքին, Զեֆտա հովտին և Ազզայի ու Ռումին Արկիի միջև ընկած տարածքին։ Զոհերի մասին անմիջապես տեղեկություններ չեն ստացվել։

Իսրայելական բանակն էլ X-ում գրառմամբ հայտնել է, որ հարվածել է «Հըզբոլլահ»-ի հետ կապված մի քանի վայրերի, այդ թվում՝ դրա էլիտար «Ռադվան» ուժերի կողմից օգտագործվող հատուկ գործողությունների վարժական համալիրին։ Հաղորդվում է, որ հարվածներ են հասցվել նաև մի քանի շենքերի և հրթիռային կայանի։

Հարձակումները տեղի են ունեցել հրադադարի մոնիթորինգի համար պատասխանատու ռազմական կոմիտե Իսրայելի և Լիբանանի կողմից քաղաքացիական ներկայացուցիչների ուղարկելուց մի քանի օր անց։ Լիբանանի նախագահ Ջոզեֆ Աունը ուրբաթ հայտարարել է, որ Բեյրութն «ընդունել է Իսրայելի հետ բանակցությունների տարբերակը», և որ դրանք նպատակ ունեն դադարեցնել Իսրայելի կողմից Լիբանանի վրա շարունակվող հարձակումները։

Վաշինգտոնի միջնորդությամբ 2024 թվականին կնքված ներկայիս հրադադարը վերջ դրեց Իսրայելի և «Հըզբոլլահ»-ի միջև ավելի քան մեկ տարի տևած բախումներին։ Սակայն Իսրայելը շարունակել է գրեթե ամեն օր հարվածել Լիբանանին։

Նոյեմբերին հրապարակված ՄԱԿ-ի զեկույցում ասվում է, որ հրադադարի ուժի մեջ մտնելուց ի վեր Լիբանանում սպանվել է առնվազն 127 քաղաքացիական անձ, այդ թվում՝ երեխաներ։ ՄԱԿ-ի պաշտոնյաները զգուշացրել են, որ հարվածները համարվում են «ռազմական հանցագործություն»։

Լարվածությունն է՛լ ավելի սրվեց անցյալ շաբաթ, երբ Իսրայելը ռմբակոծեց Բեյրութի հարավային արվարձանները, որի հետևանքով սպանվեց «Հըզբոլլահ»-ի գլխավոր ռազմական հրամանատար Հայթամ Ալի Թաբթաբայը։

Իսրայելը Լիբանանին մեղադրում է բավարար միջոցներ չձեռնարկելու համար, որ «Հըզբոլլահ»-ը հրաժարվի երկրի ամբողջ տարածքում իր զինանոցից, ինչը Լիբանանի կառավարությունը հերքում է։ Լիբանանի վարչապետ Նավաֆ Սալամն անցյալ շաբաթ հայտարարեց, որ Բեյրութը կցանկանար, որ հրադադարի մոնիթորինգի մեխանիզմն ավելի ակտիվ դեր խաղա «Հըզբոլլահ»-ի վերազինման վերաբերյալ Իսրայելի պնդումների ստուգման, ինչպես նաև Լիբանանի բանակի կողմից զինված խմբավորման ենթակառուցվածքների ապամոնտաժման ջանքերի մոնիթորինգի գործում։

Հարցին՝ արդյո՞ք սա նշանակում է, որ Լիբանանը կհամաձայնվի իր տարածքում ամերիկյան և ֆրանսիական զորքերի ներկայության հետ՝ որպես ստուգման մեխանիզմի մաս, Սալամը պատասխանել է. «Իհարկե»։

Իսրայելի շարունակական հարվածները Լիբանանում մտահոգություններ են առաջացրել, որ իսրայելական ուժերը կարող են ընդլայնել իրենց օդային արշավը։

Միաժամանակ, «Հըզբոլլահ»-ը հայտարարել է, որ չի հրաժարվի իր զենքերից, քանի դեռ Իսրայելը շարունակում է հարվածել Լիբանանի տարածքին և գրավել հարավում գտնվող հինգ կետերը։

Թարգմանությունը՝ Էմմա Չոբանյանի