16.02.2026 | 00:04
Հայաստանի գեղասահորդները հաջող մեկնարկեցին Օլիմպիական խաղերում․ ՏԵՍԱՆՅՈՒԹ
Սիրիայի անցումային նախագահը կոչ է արել միավորել ջանքերը Ասադի տապալումից մեկ տարի անց
Քաղաքականություն
08.12.2025 | 16:24
Սիրիայի անցումային նախագահ Ահմեդ ալ-Շարաան սիրիացիներին կոչ է արել համատեղ աշխատել իրենց երկիրը վերականգնելու համար՝ նշելով Բաշար ալ-Ասադի երկարամյա ղեկավարի տապալման մեկ տարին, գրում է Al-Arabiya-ն։
Ալ-Շարաայի գլխավորած դաշինքն անցյալ տարվա նոյեմբերի վերջին կայծակնային հարձակում սկսեց՝ գրեթե 14 տարի տևած պատերազմից հետո դեկտեմբերի 8-ին գրավելով մայրաքաղաք Դամասկոսը և վերջ դնելով Ասադների ընտանիքի՝ ավելի քան հինգ տասնամյակ տևած կառավարմանը։
Մայրաքաղաքի հայտնի Ումայադ մզկիթում լուսաբացին աղոթքից հետո ալ-Շարաան «գովաբանել է Դամասկոս մտած մարտիկների զոհողություններն ու հերոսությունը», ասվում է նախագահության հայտարարության մեջ։
«Ներկայիս փուլը պահանջում է բոլոր քաղաքացիների ջանքերի միավորում՝ ուժեղ Սիրիա կառուցելու, նրա կայունությունն ամրապնդելու, ինքնիշխանությունը պաշտպանելու և նրա ժողովրդի զոհողություններին համապատասխան ապագայի հասնելու համար»,- ասել է ալ-Շարաան, որը եղել է զինվորական հագուստով՝ ինչպես մեկ տարի առաջ մայրաքաղաք մտնելիս։
Հրապարակման համաձայն՝ Ալ-Շարաային հաջողվել է վերականգնել Սիրիայի միջազգային հեղինակությունն ու ապահովել պատժամիջոցների վերացումը։ Սակայն նա լուրջ մարտահրավերների է բախվում անվտանգության ապահովման, փլուզվող ինստիտուտների վերականգնման, սիրիացիների վստահությունը վերականգնելու և իր երկիրը միասնական պահելու հարցում։ Երկրի ալևի և դրուզ փոքրամասնությունների միջև դավանանքային արյունահեղությունը, ինչպես նաև Իսրայելի շարունակական ռազմական գործողությունները ցնցել են երկրի փխրուն կայունությունը։
ՄԱԿ-ի գլխավոր քարտուղար Անտոնիո Գուտերեշը հայտարարել է, որ «առջևում սպասվում է շատ ավելին, քան պարզապես քաղաքական անցումը. դա հնարավորություն է՝ վերականգնել քանդված համայնքները և բուժել խորը բաժանումները»։
«Սա հնարավորություն է՝ ստեղծելու մի ազգ, որտեղ յուրաքանչյուր սիրիացի, անկախ էթնիկ պատկանելությունից, կրոնից, սեռից կամ քաղաքական պատկանելությունից, կարող է ապրել անվտանգ, հավասար և արժանապատվորեն»,- ասել է նա հայտարարության մեջ՝ կոչ անելով միջազգային աջակցություն ստանալ։
Քրդական վարչակազմը, որը վերահսկում է Սիրիայի հյուսիս-արևելքի որոշ հատվածներ, մարտին կնքված համաձայնագրի համաձայն՝ պետք է իր ինստիտուտներն ինտեգրի կենտրոնական կառավարությանը մինչև տարեվերջ, սակայն գործընթացը կանգ է առել։ Քրդական առաջնորդ Մազլում Աբդին կիրակի X-ում արված գրառման մեջ վերահաստատել է քրդերի հավատարմությունը համաձայնագրին՝ ասելով, որ այն հիմք է «ժողովրդավարական, ապակենտրոնացված Սիրիայի կառուցման համար՝ ամրապնդված ազատության, արդարության և հավասարության արժեքներով»։
Թարգմանությունը՝ Էմմա Չոբանյանի
