10.09.2026 | 23:04
ԿԳՄՍ նախարարը մանկավարժների հետ ոլորտային հարցեր է քննարկել
«Ինտեր Մայամին»` MLS-ի չեմպիոն, Բուսկետսն ու Ալբան ավարտեցին կարիերան․ ՏԵՍԱՆՅՈՒԹ
07.12.2025 | 12:02
Ամերիկյան «Ինտեր Մայամին» պատմության մեջ առաջին անգամ նվաճել է MLS-ի չեմպիոնի տիտղոսը։
Եզրափակիչում ամերիկյան ակումբը 3։1 հաշվով առավելության է հասել կանադական «Վանկուվեր Ուայթքեփսի» նկատմամբ։
Աշխարհի չեմպիոն Արգենտինայի հավաքականի ավագ Լիոնել Մեսին «Ինտեր Մայամիի» կազմում կատարել է 2 գոլային փոխանցում։ 38-ամյա հարձակվողը ճանաչվել է MLS-ի գավաթի ամենաարժեքավոր ֆուտբոլիստ։ Մեսին նաև նվաճել է կարիերայի 48-րդ տիտղոսը՝ թարմացնելով համաշխարհային ռեկորդը։ Այդ ցուցանիշով երկրորդը բրազիլացի Դանի Ալվեսն է, որն ունի 45 տիտղոս։
Ամերիկյան ակումբի գոլերից մեկը խփել է արգենտինացի հարձակվող Տադեո Ալենդեն՝ սահմանելով MLS-ի մեկ մրցաշրջանի փլեյ-օֆֆի գոլային ռեկորդ։ Դա 26-ամյա ֆուտբոլիստի 9-րդ գոլն էր այս փլեյ-օֆֆում։
«Ինտեր Մայամիի» մեկնարկային կազմում առանց փոխարինման խաղացել են նաև «Բարսելոնայի» ու Իսպանիայի հավաքականի նախկին ֆուտբոլիստներ Ժորդի Ալբան և Սերխիո Բուսկետսը, որոնք անցկացրել են կարիերայի վերջին հանդիպումը։
«Վանկուվերի» կազմում ամբողջ խաղին մասնակցել է «Բավարիայի» ու Գերմանիայի հավաքականի նախկին կիսապաշտպան Թոմաս Մյուլերը։
Հիշեցնենք, որ «Ինտեր Մայամիի» համասեփականատերն անգլիացի անվանի ֆուտբոլիստ Դևիդ Բեքհեմն է, գլխավոր մարզիչը՝ «Բարսելոնայի» ու Արգենտինայի հավաքականի նախկին պաշտպան Խավիեր Մասկերանոն։
