09.06.2026 | 00:17
Մարկո Ռուբիոն շնորհավորել է Փաշինյանին
Թյուրքական պետությունների կազմակերպության գլխավոր քարտուղարը խոսել է «Զանգեզուրի միջանցքի» առանցքային նշանակությունից
Քաղաքականություն
05.12.2025 | 16:45
«Զանգեզուրի միջանցքը» կենսական նշանակություն ունի ոչ միայն թյուրքական պետությունների, այլև ամբողջ տարածաշրջանի և նույնիսկ աշխարհի համար»։ Այս մասին ադրբեջանական լրատվամիջոցների հետ զրույցում հայտարարել է Թյուրքական պետությունների կազմակերպության գլխավոր քարտուղար Կուբանիչբեկ Օմուրալիևը Բաքվում կայացած կազմակերպության անդամ երկրների աշխատանքի և սոցիալական պաշտպանության նախարարների առաջին հանդիպման շրջանակում։
Նրա խոսքով՝ «Զանգեզուրի միջանցքը» հին Մետաքսի ճանապարհի առանցքային երթուղիներից մեկն է և թյուրքական պետություններին ուղիղ մուտք է ապահովում դեպի Արևմուտք։
«Այս տեսանկյունից Զանգեզուրի միջանցքը կարևոր է ոչ միայն Ադրբեջանի և թյուրքական աշխարհի, այլև ամբողջ տարածաշրջանի, այդ թվում՝ Արևմուտքի, Եվրոպայի և նույնիսկ Հայաստանի համար։ Այս համատեքստում ես բարձր եմ գնահատում այս օգոստոսին Վաշինգտոնում Ադրբեջանի և Հայաստանի ղեկավարների կողմից Վաշինգտոնում ձեռք բերված համաձայնագիրը։ Ես սա համարում եմ պատմական քայլ»,- նշել է Օմուրալիևը։
Հավելենք, որ Վաշինգտոնում օգոստոսի 8-ին ստորագրված համաձայնագրերով որևէ «Զանգեզուրի միջանցքի» մասին խոսք չկա։ Դրանցում նշվում է «Թրամփի երթուղու» (TRIPP) մասին, սակայն Բաքվի քարոզչամեքենան ու ադրբեջանցի պաշտոնյաները, Ադրբեջանի հետ կապված գործիչները շարունակում են «միջանցք» եզրույթն օգտագործել՝ խեղաթյուրելով նաև ստորագրված փաստաթղթերի բովանդակությունը ու այդ թեմայով միջոցառումներ կազմակերպել։
Թարգմանությունը՝ Էմմա Չոբանյանի
