ՆԱՏՕ-ն Հյուսիսային Եվրոպայի պաշտպանության շտաբը կտեղափոխի ԱՄՆ

ՆԱՏՕ-ն Դանիայի, Շվեդիայի և Ֆինլանդիայի պաշտպանության պլանավորման պատասխանատվությունը Նիդերլանդների Բրյունսում քաղաքում գտնվող իր օպերատիվ շտաբից կփոխանցի ամերիկյան Նորֆոլկում գտնվող հրամանատարություն: Եվրոպայում դաշնակից ուժերի (JFEUR) հրամանատար Ալեքսուս Գրինկևիչի համապատասխան հայտարարությունը հրապարակվել է կազմակերպության կայքում, գրում է DW-ի ռուսական ծառայությունը։

Փոփոխություններն ուժի մեջ կմտնեն դեկտեմբերի 5-ին, որի առիթով արարողությունը տեղի կունենա Ֆինլանդիայում:

Նշվում է, որ Նորֆոլկում գտնվող ՆԱՏՕ-ի կենտրոնակայանն արդեն իսկ պատասխանատու է Ատլանտյան օվկիանոսի, Արկտիկայի, Գրենլանդիայի, Իսլանդիայի, Նորվեգիայի և Միացյալ Թագավորության անվտանգության համար։

«ՆԱՏՕ-ի միացյալ ուժերի հրամանատարության տեսանկյունից Նորֆոլկը ռազմավարական կամուրջ է Հյուսիսային Ամերիկայի և Եվրոպայի միջև, որը պաշտպանում է ոչ միայն մեր ծովային հաղորդակցությունները»,- նշել է Գրինկևիչը:

Այնուամենայնիվ, ըստ dpa գործակալության, Գերմանիայի և Արևելյան Եվրոպայի դաշնակից երկրների պաշտպանության կազմակերպման պատասխանատվությունը կմնա Բրյունսումի կենտրոնակայանին։

Նոյեմբերի 22-ին Նիդերլանդների երկրորդ խոշորագույն օդանավակայանը, որը գտնվում է Էյնդհովենում, երկու ժամով դադարեցրել է գործունեությունը մի քանի անօդաչու թռչող սարքերի հայտնաբերման պատճառով։ Նախորդ օրը երկրի պաշտպանության նախարարությունը հայտնել էր, որ զենք է օգտագործվել Էյնդհովենից 40 կմ հեռավորության վրա գտնվող Ֆոլկել գյուղի ռազմական ավիաբազայի վրա անօդաչու թռչող սարքերը խոցելու համար։ Աշնան սկզբից ի վեր անօդաչու թռչող սարքերի բազմաթիվ միջադեպեր են տեղի ունեցել նաև այլ եվրոպական երկրների օդանավակայանների ու այլ օբյեկտների վրա: Մասնավորապես, դրանք նկատվել են Գերմանիայում, Դանիայում, Բելգիայում, Շվեդիայում, Նորվեգիայում և Լեհաստանում։

Թարգմանությունը՝ Էմմա Չոբանյանի