Զախարովան ԼՂ-ի հակամարտության հետ կապված փաստաթղթերի հրապարակումն «էթիկայի անտեսում» է որակել

Հայաստանի իշխանություններն անտեսել են էթիկայի նորմերը՝ առանց համաձայնության հրապարակելով ԵԱՀԿ Մինսկի խմբի եռյակի աշխատանքային փաստաթղթերը, ինչպես նաև պետությունների ղեկավարների միջև նամակագրությունը։ Սակայն հրապարակված փաստաթղթերն իրենք են հերքում Հայաստանի կողմից առաջ քաշված փաստարկները։ Այս մասին ճեպազրույցի ժամանակ հայտարարել է ՌԴ ԱԳ նախարարության պաշտոնական ներկայացուցիչ Մարիա Զախարովան։

«Երևանը պարզապես անտեսեց էթիկական նորմերը՝ բացահայտելով Մինսկի խմբի երեք համանախագահների աշխատանքային նյութերը, առավել ևս՝ պետությունների ղեկավարների միջև նամակագրությունը՝ առանց շահագրգիռ կողմերի հետ պատշաճ համակարգման։ Բայց քանի որ նրանք արդեն դա արել են, մենք կարող ենք մեկնաբանել դա։ Եվ, ինձ թվում է, բոլոր հրապարակված փաստաթղթերը որոշ չափով կոտրում են այն փաստարկները, որոնք Երևանը վերջերս պաշտոնապես առաջ է մղում»,- նշել է նա։

Ըստ Զախարովայի՝ ՄԱԿ-ի և ԵԱՀԿ-ի հրապարակված փաստաթղթերը, որոնց ընդունմանը և մշակմանն ակտիվ մասնակցություն է ունեցել Ռուսաստանը, համոզիչ կերպով հաստատում են, որ երեք տասնամյակի ընթացքում ռուսական կողմը՝ իր ազգային կարգավիճակում և որպես Մինսկի խմբի համանախագահ, հետևողական ջանքեր է գործադրել ղարաբաղյան հակամարտության քաղաքական և դիվանագիտական ​​կարգավորման հասնելու համար, և «շատ բան է արվել»։

«Մեր կարծիքով՝ հրապարակված փաստաթղթերը համոզիչ կերպով ցույց են տալիս, որ բանակցությունների տարբեր փուլերում հնարավորություններ են ստեղծվել հակամարտության քաղաքական և դիվանագիտական ​​կարգավորման և այնտեղ ապրող ժողովուրդների, այսինքն՝ տարածաշրջանի շահերը հաշվի առնելու համար։ Դրան հասնելու համար անհրաժեշտ էր ռազմավարական տեսլական և քաղաքական կամք հակամարտող կողմերի կողմից։ Եվ միջնորդների, այս դեպքում՝ Մինսկի խմբի համանախագահների խնդիրն էր՝ օգնել Բաքվին ու Երևանին լուծել հակամարտությունները, այլ ոչ թե այն վերածել անվերջ վեճի։ Այո, այս փաստաթղթերը ցույց են տալիս, որ հնարավորություններ կային, և դրանք բաց են թողնվել։ Բայց դա մեր մեղքը չէ»,- հայտարարել է  Զախարովան։

Նա նշել է, որ ռուսական դիրքորոշումը միշտ հիմնված է եղել երկու հիմնական սկզբունքների միջև հավասարակշռություն գտնելու վրա՝ «Ադրբեջանի տարածքային ամբողջականության հարգում և Լեռնային Ղարաբաղի բնիկ բնակչության իրավունքների ու շահերի ապահովում՝ միջազգային ճանաչված նորմերին ու չափանիշներին համապատասխան»։

Թարգմանությունը՝ Էմմա Չոբանյանի