11.09.2026 | 10:38
Հայաստանն Իրաքյան Քուրդիստանի հետ քննարկել է առևտրատնտեսական կապերը զարգացնելու հնարավորությունները
Ռուսական զորքերը հարվածել են Օդեսային. վիրավորներ կան
Քաղաքականություն
04.12.2025 | 12:28
Ռուսական զորքերը լույս դեկտեմբերի 4-ի գիշերը անօդաչու թռչող սարքերով հարվածել են Օդեսային, որի հետևանքով վեց մարդ է վիրավորվել։ Այս մասին հայտնել է տարածաշրջանային ռազմական վարչակազմի ղեկավար Օլեգ Կիպերը, գրում է Current time-ը։
Նրա խոսքով՝ անօդաչու թռչող սարքի բեկորները և պայթյունի ալիքը վնասել են յոթ բնակելի և մեկ վարչական շենքի դռներն ու պատուհանները, ինչպես նաև մեքենաներ։
Օդեսայի քաղաքային ռազմական վարչակազմի ղեկավար Սերգեյ Լիսակը հայտնել է, որ քաղաքի Պերեսիպ շրջանի մի մասը մնում է առանց էլեկտրաէներգիայի, կոմունալ ծառայություններն աշխատում են հարձակման հետևանքները վերացնելու ուղղությամբ։
Ուկրաինայի ռազմաօդային ուժերը հայտնում են, որ գիշերը ռուսական զորքերը հարձակվել են Ուկրաինայի վրա երկու «Իսկանդեր-Մ» բալիստիկ հրթիռներով և 138 անօդաչու թռչող սարքերով։ Նշվում է, որ առավոտյան ժամը 9:00-ի դրությամբ՝ «խոցվել կամ ճնշվել» է 114 անօդաչու թռչող սարք, իսկ բալիստիկ հրթիռներով և 24 հարձակողական անօդաչու թռչող սարքերով հարվածներ են գրանցվել 14 վայրերում։
Թարգմանությունը՝ Էմմա Չոբանյանի
