25.12.2025 | 23:38
Ճապոնիայում 5,6 մագնիտուդով երկրաշարժ է գրանցվել
ՄԱԿ-ի Գլխավոր վեհաժողովը ՌԴ-ից պահանջել է վերադարձնել ուկրաինացի երեխաներին. ինչպես է քվեարկել Հայաստանը
Քաղաքականություն
04.12.2025 | 11:21
ՄԱԿ-ի Գլխավոր վեհաժողովը բանաձև է ընդունել, որը Ռուսաստանից պահանջում է «ապահովել բռնի տեղահանված կամ արտաքսված ուկրաինացի երեխաների անհապաղ, անվտանգ և անվերապահ վերադարձը», գրում է BBC-ի ռուսական ծառայությունը։
Բանաձևին աջակցել են Գլխավոր վեհաժողովի մասնակից 91 երկրներ, այդ թվում՝ ԱՄՆ-ն, դեմ է քվեարկել 12, ձեռնպահ՝ 57 երկիր։ Դեմ քվեարկողների թվում են Բելառուսը, Բուրկինա Ֆասոն, Բուրունդին, Կուբան, Հյուսիսային Կորեան, Էրիթրեան, Իրանը, Մալին, Նիկարագուան, Նիգերը, Սուդանը և հենց Ռուսաստանը։
Հայաստանը բանաձևին ձեռնպահ է քվեարկել, Վրաստանը՝ կողմ, իսկ ահա Ադրբեջանն ու Թուրքիան քվեարկությանը չեն մասնակցել։
Բանաձևը պահանջում է, որ Մոսկվան «անհապաղ դադարեցնի» ուկրաինացի երեխաների հարկադիր տեղափոխումը, նրանց ընտանիքներից բաժանելը, քաղաքացիության փոփոխությունը և ինդոկտրինացիան։
Ուկրաինան հայտարարում է, որ Ռուսաստանը լայնածավալ ներխուժման սկզբից ի վեր երկրից բռնի կերպով տարել է առնվազն 20,000 ուկրաինացի երեխաների։ Կիևը պնդում է, որ հաջողվել է նրանցից միայն 1850-ին վերադարձնել հայրենիք։
Ուկրաինայից երեխաների արտաքսման հետ կապված՝ Հաագայի Միջազգային քրեական դատարանը ՌԴ նախագահ Վլադիմիր Պուտինի, ինչպես նաև երեխաների իրավունքների հանձնակատար Մարիա Լվովա-Բելովայի ձերբակալման օրդեր է տվել։ Ռուսաստանը բազմիցս արտաքսման մեղադրանքներն անարդար է անվանել։
Թարգմանությունը՝ Էմմա Չոբանյանի
