Հովհաննես Բաչկովն ընդգրկվել է աշխարհի առաջնության հայտացուցակում

Տոկիոյի Օլիմպիական խաղերի բրոնզե մեդալակիր, Եվրոպայի եռակի չեմպիոն, աշխարհի առաջնության քառակի բրոնզե մեդալակիր Հովհաննես Բաչկովն ընդգրկվել է բռնցքամարտի Հայաստանի հավաքականի հայտացուցակում և կմասնակցի Դուբայում մեկնարկած աշխարհի առաջնությանը։

67 կգ քաշային կարգում Հայաստանը կունենա 2 ներկայացուցիչ՝ Հովհաննես Բաչկով և Արմեն Մաշակարյան։ IBA-ն հնարավորություն է տվել IBA PRO գոտին նվաճած մարզիկներին նույնպես մասնակցել աշխարհի առաջնությանը։

33-ամյա բռնցքամարտիկը վերջին շրջանում անցկացնում է պրոֆեսիոնալ մենամարտեր։ Պրոֆեսիոնալ ռինգում Բաչկովը մասնակցել է 8 մենամարտի ու տարել նույնքան հաղթանակ։

Դեկտեմբերի 4-ին` ԱԱ-ի առաջին մրցումային օրը, ռինգ դուրս կգա 3 հայ բռնցքամարտիկ: Արարատ Հարությունյանը (71 կգ) կմրցի Ինդոնեզիայի ներկայացուցիչ Ալֆինո Ցեզարի հետ, Վախթանգ Հարությունյանի (75 կգ) մրցակիցը կլինի նիգերիացի Աբդուլ Բակի Ադամոուն, իսկ Նարեկ Մանասյանն (92 կգ) ուժերը կչափի Կուկի կղզիները ներկայացնող Մայքլ Շուստերի հետ։

Հայաստանի հավաքականի կազմում մրցավայր են մեկնել նաև Բարեղամ Հարությունյանը (48 կգ), Ռուդոլֆ Գարբոյանը (51 կգ), Դավիթ Եգորյանը (54 կգ), Ժիրայր Սարգսյանը (57 կգ), Արթուր Բազեյան (60 կգ), Նարեկ Հովհաննիսյանը (63,5 կգ), Արտուշ Հովհաննիսյանը (80 կգ), Ռաֆայել Հովհաննիսյանը (86 կգ) և Դավիթ Չալոյանը (+92 կգ)։

Աշխարհի առաջնությունը կավարտվի դեկտեմբերի 13-ին, 13 քաշային կարգում մասնակցում է 108 երկրի 428 բռնցքամարտիկ։ Մրցանակային հիմնադրամը ռեկորդային 8 միլիոն դոլար է։ Աշխարհի չեմպիոնները կստանան 300 հազար դոլար, փոխչեմպիոնները՝ 150 հազար, բրոնզե մեդալակիրները՝ 75 հազար, իսկ 5-րդ տեղ գրաված բռնցքամարտիկները՝ 10 հազար։