Թուրքական ռազմարդյունաբերական հինգ ընկերություններ ընդգրկվել են աշխարհի ամենաբարձր եկամուտ ունեցող զենք արտադրողների ցանկում

Ստոկհոլմի խաղաղության հետազոտությունների միջազգային ինստիտուտի (SIPRI) հրապարակած ցանկի համաձայն՝ Թուրքիայից հինգ ընկերություն ընդգրկվել է աշխարհի 100 լավագույն զենք արտադրողների շարքում, գրում է Bianet-ը։

SIPRI-ն հայտնել է, որ 2024 թվականին 100 լավագույն ընկերությունների եկամուտները կազմել են ռեկորդային՝ 679 միլիարդ դոլար, ինչը 5,9%-ով ավելի է, քան 2023 թվականին։ Ցանկում ընդգրկված հինգ թուրքական ընկերությունները հայտնել են 10,1 միլիարդ դոլարի համակցված եկամտի մասին, ինչը 11%-ով ավելի է նախորդ տարվա համեմատ։

Ընկերություններից չորսը վերահսկվում են պետության կողմից, իսկ մեկը՝ անօդաչու թռչող սարքերի արտադրող Baykar-ը, մասնավոր ձեռնարկություն է։

Aselsan-ը զբաղեցրել է ամենաբարձր հորիզոնականը՝ 47-րդ տեղը՝ 3,47 միլիարդ դոլար եկամուտով և 24,4% աճով։

Թուրքական ավիատիեզերական արդյունաբերությունը (TAI) զբաղեցրել է 65-րդ տեղը՝ 2,16 միլիարդ դոլարով, ինչը 11,3%-ով ավելի է։

Անօդաչու թռչող սարքերի արտադրող Baykar-ը զբաղեցրել է 73-րդ տեղը՝ 1,9 միլիարդ դոլարով, ինչը 12,4%-ով ավելի է։

Rokestan-ը 87-րդ տեղում է ՝ 1,39 միլիարդ դոլարով, ինչը 13%-ով ավելի է։

Մեխանիկական և քիմիական արդյունաբերության կորպորացիան (MKE) առաջին անգամ ընդգրկվել է լավագույն 100-ի մեջ՝ զբաղեցնելով 93-րդ տեղը 1,21 միլիարդ դոլարով և 17,4% աճով՝ 2023 թվականի համեմատ։

SIPRI-ի տվյալներով՝ Ուկրաինայում և Գազայում պատերազմները, աշխարհաքաղաքական լարվածության աճը և ռազմական ծախսերի աճը 2024 թվականին մեծացրել են սպառազինության պահանջարկը։

Թուրքիայի ռազմական ծախսերը, որոնք նվազել էին 2020-2022 թվականներին, վերջին երկու տարիների ընթացքում զգալիորեն աճել են։2023 թվականին պաշտպանության ծախսերը նախորդ տարվա համեմատ աճել են 30%-ով։ 2024 թվականին դրանք աճել են ևս 27.6%-ով՝ հասնելով 22.7 միլիարդ դոլարի։ Սա կազմում է Թուրքիայի համախառն ներքին արդյունքի (ՀՆԱ) 2.1%-ը։

Թարգմանությունը՝ Էմմա Չոբանյանի